Pooriisi necondooza okufa kw’abantu 4 b’eka emwe

N’ebya Jeff Andrew Lule  

Pooriisi omuri Nsangi omu disiturikiti ya Wakiso eriyo necondooza okufa kw’abantu 4 b’eka emwe.

Abatuura b’ekyaro ekya Masanda cell omu tauni kanso eya Kyengera bagwereirwe akagwe aharwakataano, 15/11/2024 bwanyima y’okushanga abantu 4 b’eka emwe bafeereire omu nju yaabo.

Abafiire harimu Simon Nyanzi, 40, omuvugi wa takisi n’abaana 3; Pius Kabanda, 8, Priscilla, 7, na Praise ow’emyaka 2.

Abatuura berarikiriire kubareebire Nyanzi atarikwigura ahanju kandi n’abaana babaire batari n’orikubareeberera.

Abatuura bataahire omu nju nikwo kushanga abantu aba barambire ahakitanda boona bafiire.

Omugambirizi wa pooriisi eya Kampala n’emyanya egyetoreire, Patrick Onyango naagira ngu abatuura bamanyiise Ceeyamaani w’ekyaro ogambireho pooriisi.

Pooriisi ehikire ahamwanya ogu kandi eheerize yatwara emibiri y’abafiire omukabafu ah’eirwariro erya Mulago kukyeberwa.

Onyango naagira ngu pooriisi yatandikire okucondooza.

#WestUpdates