Pooriisi nehiiga omuzaarisa w’ekyaro ahabw’okufa kw’omukazi w’enda.

N’ebya Doreen Musingo

MAYUGE

Pooriisi omu disiturikiti ya Mayuge eriyo nehiiga omuzaarisa w’ekyaro (traditional birth attendant) bwanyima y’omukazi w’enda kufeera omu maka gye.

Juniper Ajambo, 30, omukazi w’abaana 3 agiire kuzaarira omu maka g’omuzaarisa w’ekyaro omu kyaro ekya Basasero ‘A’ omu gomborora eya Bukatuube ahi afeeriire.

Omuzaarisa w’ekyaro omanyirwe nka; Rose Amuge naagambwa kuba atorokire omu maka gye n’aba famire ye bwanyima y’okufa kwa Ajambo aharwakabiri ebiro 02/01/2024.

Omugyenzi n’omutuura w’omu kyaro ekya Namagera omu gomborora eya Baitambogwe omuri Mayuge.

Omugambirizi wa Pooriisi ahabw’ekyanga ekya Busoga East, Diana Nandawala naagira ngu Ajambo agiire omu maka ga Amuge kuzaariirayo ahi embeera ye eyeyongiire kuba mbi.

"Bwanyima y’embeera ye kuba mbi ekimurugiiremu okufa, Amuge hamwe n’aba memba boona aba famire ye babuzireho basiga omutumbi gwa Ajambo omuka yaabo gwonka,” Nandawala arikushoborora.

Nandawala aharwakana agambiire abanyamakuru ngu bariyo nibahiiga Amuge n’aba famire ye kubahweraho omu kucondooza.

Nakyoreka ngu Pooriisi ehikire aha mwanya nikwo kutwara omutumbi gwa Ajambo omu kabafu ah’eirwariro erya Mayuge kukyeberwa.

Omutumbi gwe guhairwe abanyabuzaare be kuguziika kandi aziikirwe aharwakana ebiro 04/01/2024 omu kyaro ekya Namagera omu gomborora eya Baitambogwe.

Nandawala narabura abakazi b’enda okwerinda okuza omu bazaarisa b’ebyaro kuzaarirayo arikugira ngu bashemeriire kuzaarira omu marwariro ahari abashaho abahangu.

#WestUpdates