Purezidenti Museveni arikubugana abahingi n'abariisa ab'omutaano kuruga omubyaro 9 bya disiturikiti ya Gamba na Sembabule

Obu abaire ataayayeise abahingi n’abariisa b’omutaano kuruga omubyaro mwenda ebya disiturikiti za Gomba na Sembabule, aha faamu ye eya Kisozi, Purezidenti Museveni n’omukazi we kandi Minisita w’eby’obwegyese n’emizaano, Maama Janet Kataha Museveni, boorekire omugasho gw’okwebembeza entaasya y’eka nka kimwe ahabintu bikuru ebirikureetaho entunguuka.

Omurukiiko orubaireho Orwakabiri ebiro 02.04.2024, Purezidenti Museveni ahamize omurimo muhango ogu abebembemzi barikukora kurugira kimwe omubyanga eby’ahansi barikwenegyeza okugaigahara obu abaire nayoreka omurimo gw’okutunguura ebyaro bya Kisozi ogwatandikire omugwa 2011.

“Abantu bashemereire kukorera enda hamwe n’enshaho kandi aha mushemereire kukorera enshaho murikutamu ekibaro. Obu butwire buri obutumwa bwaitu kuruga omumyaka ya 1960. Tindikumanya ahabw’enki abeebembezi baanyu barigambirira munonga emirimo y’okukora enguuto, amashanyarazi n’endiijo mirimo erikureetaho entunguuka bakeebwa entaasya y’eka. Nitubaasa kugira ebintu birungi ebirikureetaho entunguuka n’obutwakuba turi abooro kwonka nitubaasa kukora ebintu ebirikutureetera obugaiga n’obutwakuba tutaine ebintu ebirikureetaho entunguuka,” nikwo Purezidenti agizire.

Omugwa 2011, Purezidenti Museveni akagabira amaka g’omuri Gomba na Sembabule ente, embuzi, omwani, empunu, sente hamwe n’ebindi bihingwa n’amatungo n’ekigyendererwa ky’okubahwera kurwanisa obworo n’okwongyera ahantaasya.

Ebyaro ebyatungire birimu, Kirasi, Kisozi A, Kisozi B, Obutugu, Lutunku A, Lutunku B, Kajumilo, Kasozi na Kakuumadungu.

Ku abaire nagamba aharugyendo oru orumazire amakumi g’emyaka arikuteerera abanya Uganda omuranga kuhangago obugaiga, Purezidenti Museveni agambire ahankora ezi yaatandikaniise kurugira kimwe omumyaka eya 1960 obu atandikaho ehururu y’okurwanisa obworo omukyanga ekya Ankore.

Agizire ngu ekirooto kye kikaba kishororongire kurungi kandi kikaba kiri eky’okuta emyoga omubyanga barikubashagika omukukoresa emiringo y’okuriisa, okuhinga n’okushuubura eby’omurembe.

Meeting Exemplary Farmers From Nine Villages Of Gomba & Sembabule Districts Together With Leaders Kisozi Farm 32

Purezidenti Museveni ayijukire arikuhabura abariisa omukyanga ekirikuriisa ente kuruga omukuriisa kw’okugyenda-gyenda bakaza ahamuringo gw’okuriisiza hamwe arikubagambira emigasho hamwe n’ebirungi ebirikuruga omukuriisiza amate hamwe n’okukoresa kurungi eitaka.

“Abantu ba Ankore bakaakiira obutumwa bwangye obw’okukora kugaigahara,” nikwo Purezidenti Museveni ayongyeireho arikworeka obusinguzi omunkora ye y’okugyezaho kutunguura entaasya y’ekyanga kya Ankore. 
#WestUpdates