Purezidenti Museveni ateire omukono ahakihandiiko ky’omwani kuba ekiragiro.

N’ebya Omushaki weitu

Purezidenti Yoweri Kaguta Museveni ateire omukono aha kihandiiko ky’omwani ekya National Coffee (Amendment) Bill 2024 kuba ekiragiro. Ebi n’ebirangiriirwe ekitongore ky’amakuru ga Purezidenti.

Purezidenti ateire omukono aha kihandiiko eki ebiro 20.12.204, Okurugiirira aha kihandiiko ky’amakuru ekishohoziibwe Orw’okubanza ebiro 23.12.2024.

Ekiragiro ekisya nikigaita hamwe ekitongore ky’omutindo gw’omwani ekya Uganda Coffee Development Authority (UCDA) n’ekya minisiture y’eby’obuhingi n’oburiisa ahansi y’entebeekanisa ya gavumenti ey’okugaita hamwe ebitongore eya Rationalisation of Agencies and Public Expenditure (RAPEX).

Paramenti ekahinguza ekihandiiko ky’omwani ekya National Coffee (Amendment) Bill okwezi okuhwaire bwanyima y’okumara akaire barikukihajaanaho baremirwe kwikirizana.

Abany’ishengyero ab’orubaju oruhakani kuruga omu byanga ebirikuhingwamu omwani nk’ekya Bugisu na Buganda bakabanza kwanga ekihandiiko eki barikugira ngu nikiija kuteeganisa abahingi na munonga abatwire nibabangirwaho ekitongore ky’omwani ekya UCDA.

Bamwe omubany’ishengyero bakahika n’aha kushoohora omu Paramenti, beitu orushutamo rwa Paramenti orwabaireho ebiro 6.11.2024, ekihandiiko eki kikahamibwa Paramenti yaakihinguza.

Purezidenti Museveni akabanza kwanga kuta omukono aha kihandiiko eki nikwo kukigaruza omu Paramenti arikushaba ngu bongyere kugira ebi bateerezamu ebyabaire bihairweyo abany’ishengyero kuruga omu byanga ebirikuhingwamu omwani.

Ekitongore ekya UCDA kikateebwaho omu mwaka gwa 1991 n’ekigyendererwa ky’okujunaanizibwa ahamutindo gw’omwani, okugwongyeramu omutindo, okutungira omwani akatare hamwe n’okwongyera ahantaasya y’abahingi b’omwani.

#WestUpdates