Okurugiirira ahari Purezidenti Museveni, akakooko ka siriimu n’ekizibu ekirikureetwa emicwe mibi. PPU Photos.

N’ebya Omushaki weitu

BUYENDE.

Purezidenti Yoweri Kaguta Museveni nashaba abanya-Uganda okwerinda kureeba tibakwatwa akakooko ka siriimu.

Purezidenti agambire ebi nyomwebazyo aha Sande ebiro 01.12.2024 aha mukoro gw’okukuza ekiro ky’akakooko ka siriimu ekya World AIDS Day ogubaire ah’eishomero erya Bukungu Primary School, omu tauni kanso ya Bukungu omu disiturikiti eya Buyende.

Enkuyanja y'abantu abahikire aha mukoro gw'okukuza ekiro ky'akakooko ka siriimu eky'ensi yoona aha kishaayi ky'eishomero erya Bukungu Primary School omuri Buyende aha Sande ebiro 01.12.2024.

Emikoro y’omwaka ogu egyendeire ahansi y’omutwe ogurikugira ngu “okwongyera amaani omu miringo y’okumaraho akakooko ka siriimu omwaka gwa 2030 gwaza kuhika”.

Okurugiirira ahari Purezidenti Museveni, akakooko ka siriimu n’ekizibu ekirikureetwa emicwe mibi.

Purezidenti ayongiire yarabura abanya-Uganda okwerinda obw’amaraaya arikugira ngu obw’amaraaya nibwo bukirizeyo kukanyisa okujanjaara kw’akakooko ka siriimu.

Purezidenti Museveni nashaba abanya-Uganda okwerinda obwamaraaya.

Museveni nahabura ngu omuntu yakyebeza akashanga aine akakooko ka siriimu, ashemereire kutandika kumira emibazi nk’oku abashaho baramuragiire kwenda ngu abaase kuguma ahuriire n’okutuura amagara marungi.

Purezidenti Museveni nabwo asiimire abacondooza ba Uganda abari omu muhanda murungi kureeba ngu bajumbura omubazi okurikutamba endwara y’akakooko ka siriimu.

Aharubaju orundi, Purezidenti Museveni ashabire abantu b’omu kyanga ekya Busoga okwejumbira omu buhingi n’oburiisa obwa sente ekirikwija kubahwera kurwanisa obworo omu maka gaabo.

#WestUpdates