Purezidenti wa Gabon, Nguema aha kishaayi ky'enyonyi ekya Entebbe arikuruga omu Uganda kandi asibwirwe Omuhwezi wa Purezidenti, Rtd. Maj. Jessica Alupo. PPU Photos.

N’ebya Omushaki Weitu

Purezidenti wa Gabon, Brice Clotaire Oligui Nguema ayorekire ekiteekateeko kye ky’okukwatanisa na gavumenti ya Uganda kwongyera amaani omu puroguraamu y’okwongyera omutindo omu bintu ahabw’oburungi bw’abantu b’omu mahanga aga abiri.

Omuhwezi wa Purezidenti, Jessica Alupo arikuganiira na Purezidenti wa Gabon, Brice Oligui Nguema aha kishaayi ky'enyonyi ekya Entebbe atakarugire mu Uganda bwanyima y'okuhendera orutaayaayo rwe.

Purezidenti Nguema agambire ebi obu abaire ashendekyereziibwe omukazi we, Zita Oligui, ahabiro 01.08.2024 obu abaire ataayaayire fakitore ya Fine Spinners Uganda Ltd factory, erikushangwa aharuguuto orwa Spring omuri Kiswa Zone, Bugoloobi omu rurembo Kampala.

Nguema n’omukazi we, baakiirwe aha fakitore egi ceeyamaani w’omwanya ogu, Jaswinder Bedi n’omutabani ori mukuru wa fakitore egi, Sav Bedi. Fakitore egi nekora T-shirts, ebiteeteeyo by’abakazi n’abaana, ebijwaro by’abashaija, unifoomu z’ebitongore bitari bimwe n’ebindi.

Nguema asiimire purezidenti mutaahi we owa Uganda, Yoweri Museveni ahabw’okwebembera ehururu y’okwongyera omutindo omu bintu.

Ayorekire ekiteekateeko kye eky’okukwatanisa na gavumenti ya Uganda omu kutunguura n’okwongyera amaani omu puroguraamu y’okwongyera omutindo omu bintu ahabw’oburungi bw’abantu ba Uganda na Gabon.

Okurugiirira ahari Bedi, fakitore egi neheereza emirimo abanya-Uganda barikurenga 1,500 abarikutendekyerwa aha murimo. Ebintu ebingi ebi fakitore egi erikukora nibiguzibwa omu mahanga ga Africa, Buraaya na Asia.

Eby’entaasya ya Gabon, eihanga eririmu abantu barikurenga 2,400,000,000 nibiruga omu by’obuhingi, ebibira, eby’obugaiga bw’omu eitaka n’eby’oburambuzi.

#WestUpdates