Majembere areebukireho omu kooti nyomwebazyo Orwakana ebiro 21.11.2024. Photo by Charles Etukuri.

N’ebya Omushaki weitu

Omuhwezi wa RDC wa Rukiga, Ivan Majambere Kamuntu Ssemakula areebukireho omu kooti ya Gomba aha mushango gw’okugambwa kuba yayibire eitaka hamwe n’amatungo. 

Majembere areebukireho omu kooti nyomwebazyo Orwakana ebiro 21.11.2024.

RDC Ivan Majembere Kamuntu Ssemakula arikushohora omu kooti ya Gomba Orwakana ebiro 21.11.2024 ahi ateirweho omushango gw'obushuma bw'eitaka n'amatungo.

Majembere akwatsirwe aha kutandika kwa wiiki bwanyima y’okucondooza okwakozirwe ekitongore ekirikurwanisa obushomankuzi omu State House ekya State House Anti-Corruption Unit hamwe na ofiisi ya mukuru w’abahababi ba gavumenti.

Nikigambwa ngu Majembere n’abandi abu arikujunaanwa nabo omu kwezi kwa 8, 2023 bakaryangatanisa eitaka rya Frank Rushanganwa eryabaire niringana hiika 300 omu disiturikiti eya Gomba.

Orwakana ebiro 21.11.2024, Omutonganiirizi mukuru wa gavumenti, Arthur Masaba ku abaire nashoma emishango agizire ngu Majembere akataahirira faamu eyabaire eriho obuteikirizana nikwo kwiba ente 157 ezabaririirwemu Sh318m.

Beitu, Majembere naagira ngu akagura kimwe aha kicweka ky’eitaka kuruga ahari Amos Mwesigye ou arikujunaanwa nawe omu mwaka gwa 2020.

Omu kwezi kwa 3,2024, kooti ekashohoza ekiragiro ky’okubinga Majembere na Mwesigye ou arikujunaanwa nawe.

Masaba agambiire kooti ngu okucondooza kukiriyo nikugyenda omu maisho ekigyemesereize omuramuzi, Pauline Sabakaki  kumusindika aha rumanda kuhisya ebiro 03.12.2024.

#WestUpdates