Aakibiishopu Stephen Kaziimba arikuhasirira Biishopu w’obureeberezi bwa East Busoga, Rt. Rev. Paul Hannington Suubi oherize kutooranwa. Photos by Jackie Nambogga.

N’ebya Jackie Nambogga 

BUGIRI

Biishopu w’obureeberezi bwa East Busoga, Rt. Rev. Paul Hannington Suubi ayemekirwe nka Biishopu omusya owa Dayosiisi egi aha kanisa ya St. Stephen’s Cathedral Naluwerere omuri Bugiri Munisiparite.

Omukoro ogu ogubaireho nyomwebazyo gubaire gwebembiirwe Aakibiishopu w’ekanisa ya Uganda, Dr. Stephen Kaziimba Mugalu kandi Rt. Rev. Suubi niwe Biishopu w’okubanza wa Dayosiisi egi.

Biishopu w’obureeberezi bwa East Busoga, Rt. Rev. Paul Hannington Suubi oherize kutooranwa arikurahira aha mukoro ogubaireho aha Sande ebiro 19/11/2023.

N’obu za Dayosiisi ensya zirikwetenga obukoryo obusya kuza kukura, Kaziimba agizire ngu aine obuhame ngu Rev. Suubi naija kukora gye omurimo gwe gw’okwebembera Dayosiisi egi nikwo kushaba omukazi we, Dr. Margret Stella Suubi n’abaana be kumushagika.

Biishopu w’obureeberezi bwa Ankole, Rt. Rev. Dr Sheldon Mwesigwa, obaire ari omuburizi mukuru ahigire ebyanga ebindi ebikiine za Dayosiisi mpango okutwaza nka Busoga ekozire arikugira ngu eki nikiteganisa okuhisya abantu obuheereza.

Central Busoga Biishopr The Rt. Rev. Patrick Wakule (bumosho) arikugwa omu kifuba Biishopu Suubi bwanyima y'okuheza kwemekwa nka Biishopu w’obureeberezi bwa East Busoga.

N’obu Dayosiisi ya West Ankole yashazirwe aha Dayosiisi ya Ankole, Biishopi Sheldon agizire ngu nakireeba ngu aine omurimo muhango kuza kuhika omu bicweka byona nikwo kushaasha n’abo abakiine Dayosiisi erimu za disiturikiti 6 arikugira ngu baine kushaba munonga.

Busoga East ni Dayosiisi ya kabiri kusharwa ahari Busoga bwanyima ya Central Busoga eyashazirweho omu mwaka gwa 2016.

Central Busoga erimu za disiturikiti 3 eya; Namutumba, Luuka na Iganga ahi ekitebe kikuru kya Dayosiisi egi kirikushangwa kandi East Busoga eine disiturikiti eya Namayingo na Bugiri ahi ofiisi enkuru zirikushangwa.

Ebicweka ebimwe ebya Namayingo na Bugiri nibishangwa aha Nyanja ya Victoria.

Beitu hoona, Biishopu Sheldon ashoboriire ngu Dayosiisi ya Busoga ebaasize kuzaara omwana musya nikwo kusiima Rt. Rev. Dr Paul Samson Naimanhye ahabw’ekiteekateeko eki.

Omu kuburira kwe, Biishopu Sheldon arabwire abakuristaayo okwetantara ebikorwa bya sitaane.

#WestUpdates