Enjura eitsire omwana, yashenya n’amaju 22 omuri Buikwe. Photo by Emmanuel Balukusa.

N’ebya Emmanuel Balukusa

BUIKWE- Enjura y’amaani egwire ebiro 17/04/2024 eitsire omwana yasiga n’abatuura baingi b’omu kyaro kya Nanso B village omu divijoni ya Nyenga omu disiturikiti eya Buikwe betaine hokwegyeka orubaju.

Edisa Nakayenze, 60, n’omwe aha batuura abateganisiibwe kandi naagira ngu enjura egi etandikire omu kiro obu abaire ariyo nayetebeekanisa kubyama.

Edisa nagaira ngu omu bwire obu enjura egweriiremu, abantu 3 nibo babaire bari omunju yaabo kandi erugirweho amabaati nikwo kuza kwegama owa muriraanwa n’okuraarayo.

Nayongyeraho ngu omuyaga nagwo gushenyire enju yaabo ekirugiiriremu ebintu ebingi kusisikara.

Sharif Kitambula, omutuura w’omu kyaro ekyo naagira ngu enjura etsire omwana womwaka gumwe Jasmine Munafu bwanyima y’okugwerwa ekisiika ky’enju eyabaire arimu n’abazaire be.

Ceeyamaani w’ekyaro, Moses Onsonga naagira ngu amaju 22 nigo gateganisiibwe enjura egi omu kyaro kye. Amaju aga obwa hati tigariho mabaati kandi agamwe gagwire.

Okurugiirira ahari Onsonga, enjura ecwekyeriize n’ebihingwa n’entookye. Naagira ngu abantu abo boona hati tibaine buraaro.

Ceeyamaani wa disiturikiti eya Buikwe, Jimmy Kanaabi naashaba gavument okuhisya obuheereza bw’esente z’okuhwera abantu abarikuba bateganisiibwe ebigwererezi aha rurengo rwa disiturikiti.

#WestUpdates