Ebikondo by'amashanyarazi ebiri omu bikuubo by’omu tauni ya Kabwohe, Sheema ei kanso erikwenda bifururwe. Photos by Bruno Mugizi..

N’ebya Bruno Mugizi

SHEEMA

Abeebembezi omu Munisiparite ya Sheema bariyo nibaronda esente zirikuhika shiringi miriyooni 400 kubaasa kwiha ebikondo by'amashanyarazi omu bikuubo by’omu tauni ya Kabwohe. 

Ebi n'ebigambirwe Alexander Kikwaya- tauni kiraaka wa Sheema Munisiparite. 

Omu mwaka gw'eby'esente oguhwaire, Munisiparite ya Sheema ekataho shiringi miriyooni 64 z’okukoresa kwiguraho ebikuubo beitu kuruga obwo, ebikuubo bitwire bitarikukora ahabw’ebikondo by’amashanyarazi ebiri ahagati yaabyo.

Omwanya ogurimu ebikondo by'amashanyarazi ebi kanso ya Sheema Munisiparite erikwenda bifururwe byihwe omu bikuubo.

Ku abaire nagambira ba kansara omu rukiiko rwa kanso orubaire aha mbuga za kanso Orwakana ebiro 02/11/2023, Kikwaya akyorekire ku ekitongore ky’amashanyarazi ekya UMEME kyaherize kushaba kanso shiringi miriyooni 400 kufurura amashanyarazi kugaiha omu bikuubo omu tauni ya Sheema.

Kikwaya ayongyeire yagira ngu batwire nibagamba nekitongore kyamashanyarazi ekya Umeme ngu beitu ebiti babitiire omumatu bayanga kubagarukamu.

Abel Kahara, Meeya wa Sheema Munisiparite naagira ngu nka kanso, tibarikwija kushashura esente ezo.

Abel Kahara, Meeya wa Sheema Munisiparite.

Kahara naagira ngu nibeija kushaba minisiture y'eby’amashanyarazi n'obugaiga bw’omu eitaka kuragiira ekitongore ky’amashanyarazi ekya Uganda Electricity Distribution Company Limited (UEDCL) kubaasa kukwatanisa na UMEME kwiha ebikondo omu myanya egyo.

#WestUpdates