Ssegirinya na Ssewanyana kureebukaho omu kooti eriizooba ahamushango gw’okwita.

N’ebya Omushaki weitu

MASAKA

Okuhurira omushango ahi abany’ishengyero babiri, Muhammad Ssegirinya na Allan Ssewanyana abarikujunaanwa omushango gw’okwita nikugarukamu eriizooba (Orw’okubanza) aha kooti enkuru eya International Crimes Division.

Ssegirinya (Kawempe North) na Ssewanyana (Makindye West) nibajunaanwa emishango erimu okwita, ogw’obuhekyera hamwe n’okuteeraho kwita eyarugiriire omu bwitane obwabaire omuri Masaka omu mwaka gwa 2021. 

Aba nibajunaanwa n’abandi bantu 5 abarimu; Bulo Wamala, John Mugerwa, Jackson Kanyike, Mike Sserwadda na Jude Muwonge.

Kooti egi neija kuba ekuriirwe Omuramuzi, Alice Komuhangi. Abatongaanirizi ba gavumenti, Richard Birivumbuka na Joseph Kyomuhendo nibo bari omu mushango ogu kandi ba Puriida, Caleb Alaka, Erias Lukwago na Shamim Malende, nibo barikujwekyera abarikuteekateekwaho.

Nikigambwa ngu ahagati y’okwezi kw’okubanza n’okwa kana, 2021, abarikujunaanwa n’abandi abakibuzire n’ekigyendererwa ky’okutiinisa abantu ahabw’enshonga ‘eby’obutegyeki, ediini n’eby’entaasya bakejumbira omu kwita abantu n’okuteeraho okwita abantu omu kyanga ekya Masaka.

Omu kwezi kwa 11, 2022, abany’ishengyero n’abandi 5 abu barikujunaanwa nabo bakatwarwa omu kooti enkuru eya International Crimes Division kuhozesibwa aha mushango gw’okwita Mugerwa Kizza, Sulaiman Kakooza n’ogw’okuteeraho kwita Ronald Sebyoto.

#WestUpdates