Abantu 6 bakwateirwe obushuma bw’amatungo- Gulu.

N’ebya Omushaki weitu

GULU

Ab’eby’okwerinda omu rurembo orwa Gulu bakwatsire abashaija 6 aharwamukaaga ebiro 12.08.2024 ahabw’okuteekateekwaho kuba batwire nibejumbira omu bushuma bw’amatungo.

Aba bakwatsirwe ahagati ya shaaha 12 na shaaha 1 z’akasheeshe omu katare ka Cereleno ahi banyakuteekateekwaho bakwatsire barikwiha oruhu aha mbuzi 4 n’ente emwe eziteekateekirwe kuba ez’enyibano.

Patrick Ebong, Ceeyamaani w’ekyaro ekya Layibi Centre A & B omu divijoni ya Pece–Laroo nakyoreka ngu okukwatwa kwabo kwizireho bwanyima y’okutunga okumanyisibwa kuruga omu batuura abakwatsirweho ababarebire barikwiha empu aha matungo omu bwire bw’enjura.

Abakwatsirwe bamanyirwe nka; Christopher Tumwesigye, 34, Walter Awiyo, 32, Brian Wamala, 30, Kenneth Okot, 32, Fred Kaffero, 27 na Michael Akena, 43.

Awiyo, omuvugi wa boda kuruga omu tauni kanso ya Kamdini omu disiturikiti ya Oyam aikiriize kuba bamupangiise kutwara amatungo aga omu katare ka Cereleno ahi Tumwesigye yabaire amutegyerereize kumushashura esente ezi yazitwarira.

Beitu hoona, Tumwesigye nakyoreka ngu amatungo aha bagamureteire kugihaho empu akagaguza arikwongyeraho ngu abaire atarikukimanya n’ag’enyibano.

Ahitugiire kuhandiikira amakuru aga, banyakuteekatekwaho babaire bari omu ofiisi ya Peter Banya, omuhwezi wa RDC orikujunanizibwa aha divijoni ya Laroo-Pece oragiire okukwatwa kwabo.

David Mudong Ongom, Omugambirizi wa Pooriisi ahabw’ekyanga ekya Aswa ahamize okukwatwa kwabo kandi okucondooza kuriyo nikugyenda omu maisho.

#WestUpdates