Abarikuteekateekwaho kwita Joan Kagezi bari omu kadukuru ka kooti ya Nakawa eriizooba ebiro 06/11/2023. Phootos by Simon Peter Tumwine.

N’ebya Michael Odeng na Farooq Kasule.

NAKAWA, KAMPALA

Abashaija 4 bateebwaho omushango gw’okwita owabaire nakora nk’omuhwezi wa mukuru w’abahababi ba gavumenti (Director of Public Prosecutions-DPP), Joan Namazzi Kagezi.

Abarikuteekateekwaho basindikwa aha rumanda omu kihome kya Luzira kuhisya ebiro 30/11/2023.

Abarikujunaanwa barimu; Daniel Kisekka, 43, John Kibuuka orikumanywa munonga nka Musa, 32, John Masajjage orikumanywa nka Brian Mubiru a.k.a Chongo, 50, na Nasur Abdallah Mugonole, 39.

Abarikuteekateekwaho okwita Joan Kagezi barikutwarwa omu kooti ya Nakawa aharw'okubanza ebiro 06/11/2023.

Kagezi akateererwa omu motoka ye omu mwabazyo gw’ebiro 30/03/2015 omuri Kiwatule, Kampala.

Abainazi bakagyenda bakuratiirize Kagezi, owaasingire abaana 4 nikwo kumuteera amasasi bwanyima y’okwemerera kugura ebijuma omuri Kiwatule.

Kuruga obwo, okucondooza kutwire nikugyenda omu maisho kuhisya wiiki ehwaire obu ebitongore by’okwerinda bikwataniise na ofiisi y’omutonganiirizi mukuru wa gavumenti bakwatsire abarikuteekateekwaho.

Aha Sande ebiro 05/11/2023, Purezidenti Yoweri Museveni agizire ngu abacondooza bakwatsire abarikuteekateekwaho omu mushango gw’okwita Kagezi.

Abarikugambwa kuba baitsire Joan Kagezi basindikirwe aha rumanda omu kihome kya Luzira.

“Aba babaire nibatamburira ahari piki 2,” Museveni arikushoborora kandi nabwo asiimire ebitongore by’okwerinda ekya Internal Security Organisation (ISO) and the Police’s Criminal Investigations Directorate (CID) ahabw’omurimo murungi ogu bakozire.

Ekitongore ekya ISO Col. Charles Oloka, kandi ekya CID nikyebemberwa AIGP, Tom Magambo.   

Eriizooba ebiro 06/11/2023, Omuramuzi wa kooti ya Nakawa, Elias Kakooza yashomera abarikuteekateekwaho emishango omuri ogw’obuhekyera n’okwita.

Abaana b'omugyenzi Joan Kagezi bari omu kooti ya Nakawa kuhurira omushango gw'okwita nyina bo.

Omuntu orikusingwa emishango egi, ekifubiro ekirikukirayo ekirikuba kiine kumuheebwa n’okwitwa.

Beitu hoona, omuramuzi tiyayikiriiza abarikujunaanwa kugira ekibagamba arikugira ngu emishango yaabo n’eyamaani kandi nehurirwa omu kooti enkuru.

Omuhwezi wa mukuru wa DPP, Thomas Jatiko na Chief State Attorney Lilian Omara bamanyisa kooti ngu okucondooza omu mushango ogu kurihakye kuhwa.

#WestUpdates