Abarikugambwa kuba baitsire Kagezi kureebukaho omu kooti eriizooba.

N’ebya Michael Odeng na Farooq Kasule 

Abantu 4 abakwatsirwe ahabw’okugira akakwate n’okwita omutonganirizi mukuru wa gavumenti, Joan Kagezi nibateekateekwa kureebukaho omu kooti ya Nakawa omuri Kampaka eriizooba ebiro 06/11/2023 kwetonganaho.

Banyakuteekateekwaho barimu; John Kibuuka, John Masajjage, Dan Kisekka na Abdalla Nasur. 

Ah Sande ebiro 05/11/2023, Purezidenti Yoweri Museveni agizire ngu abacondooza omu mushango gw’okwita Joan Kagezi bakwatsire abarikuteekateekwaho.

“Aba babaire nibatamburira ahari piki 2,” Museveni arikushoborora kandi asiimire ebitongore by’okwerinda ekya Internal Security Organisation (ISO) and the Police’s Criminal Investigations Directorate (CID) ahabw’omurimo murungi ogu bakozire.

Ekitongore ekya ISO nikyebemberwa Col. Charles Oloka, kandi ekya CID nikyebemberwa AIGP, Tom Magambo.   

Joan Kagezi, 47, akateerwa amasasi shaaha nka 1:30 z’omwabazyo aha rubaju rw’enguuto aha mudaara gw’ebijuma ahi yabaire ayemeriire kugura ebintu by’okutwara kandi akaba ariyo nataaha omu maka ge omuri Kiwatule, Kampala.

Okucondooza nikworeka ngu abainazi bakagyenda Kagezi aha kagyere nikwo kumuteera amasasi ahu yayemeriire kuza kugura ebijuma ‘fruits’.

Owayereebiire n’agye naagira ngu amasasi gakabaruka nk’omupiira gw’emotoka gwaheza kubaruka. "Nkareeba Kagezi arikugyezaho kutambira amagara ge arikujwera kimwe eshagama," Owayereebiire n'agye arikushoborora.

Kagezi akaba naburayo edakiika nkye kuhika omu maka ge.

Ebishokonkore by’amasasi 2 bikashangwa aha mwanya ogu Kagezi yayitiirweho.

Atakafiire, Kagezi akaba ari omuhwezi mukuru w’abahababi ba gavumenti (Senior Assistant Director of Public Prosecutions) arikwebembera ekitongore ekya International Crimes Department. 

Omu myaka 8 ehingwire, ebitongore by’okwerinda bitwire nibikora obucweka eihembe kukwata abaitsire Kagezi.

#WestUpdates