Abeegi 21 abafeereire omu kutaahirira omuri Kasese bazikirwe.

N’ebya Samuel Amanyire 

KASESE

Abantu 21 aha beegi abafeereire omu kutaahirira kw’abahekyera ba ADF ah’ishomero erya Mpondwe Lhubiriha Secondary School omu disiturikiti eya Kasese baziikirwe omu maka gaabo aha Sande.

Okuziika bamwe omu beegi abafeereire omu kutaahirira kwaba ADF omuri Kasese.

Omubaro gw’abantu abaitirwe omu kutaahirira oku okubaireho omu kiro ky’orwakataano ebiro 16/06/2023bahikire 41 kand 37 ahari aba n’abeegi.

Beitu, okuziika abeegi abamwe kwongyeziibweyo bwanyima yaaba famire zaabo kushanga ngu emitumbi ei babaire batwire ti yaabo.

Emitumbi y’abeegi 17 eyokiibwe yaahwaho kandi etwirwe ah’irwariro erya Fort Portal kukyeberwa DNA kumanya abazaire baabo.

Tuo

Godfrey Kabbyanga, Minisita w’eihanga ow’ebya tekinologiya ohikire aha kuziika abeegi aba, ashabire abaziiki obuteerarikirira. 

Kabbyanga ahaireyo okushaba oku obu abaire ari aha kuziiika omu maka g’omugurutsi w’emyaka 90, Bosco Masereka Bikongoro, ofeereirwe abaijukuru 3 omu kutaahirira kw’abahekyera ba ADF.

14

Ahamiize abaziiki ngu gavumenti eteire ab’eby’okwerinda barikumara aha nsharo ya Uganda na Democratic Republic of Congo hamwe n’omu disiturikiti ya Kasese ahabw’okwenda kurinda abantu n’ebintu byabo.

Kabbyanga abashabire okuba abegyendesereza munonga aha bantu abasya abarikwija omu byanga byabo kandi baaheyo enkozi z’ebihagaro ezi barikumanya omu byanga kwenda ngu gavumenti ebaase kubakoraho.

Agarukire yaashaba abantu obutatiina kuruga omu maka gaabo ngu nibatiina abahekyera ba ADF.

21

Abanyabuzaare b’abantu abafiire basiimire encwamu ya gavumenti ey’okuheereza miriyooni 5 ahari buri muntu ofiire kubahwera omu by’okuziika.

#WestUpdates