DPP kuhayo ebihandiiko bya DNA omu gw’okwita Henry Katanga.

N’ebya Omushaki weitu

KAMPALA

Okuhurira omushango gw’okwita Omushuubuzi Henry Katanga okurikugumizamu, Mukuru w’abahababi ba gavumenti (DPP) aikiriize kuhayo ebihandiiko byona ebirikwetengwa ebiine akakwate na rupoota ya DNA ehairweyo omu kooti obwo arikugiheereza tiimu y’aba Purida babakitabarizibwa abarikujwekyera efakaazi Molly Katanga omu mushango ogu.

Okugamba ebi kizireho bwanyima y’aba Purida babakitabarizibwa beebembiirwe Peter Kabatsi okworeka obutamarwa bwabo ahari rupoota ya DNA eyanjwire omu kooti omuhangu omukucondooza aha mishango, Andrew Mubiru Kizimula obu abaire naheerezayo obujurizi omu kooti.

 Aba nibagira ngu tibarikubaasa kwikirizana na rupoota ya DNA okuhisya obu baratungye ebihandiiko byona ebi bashabire.

Rupoota ya DNA ehairweyo Kizimula omu kooti neyoreka ngu ebirugire omu kukyebera DNA erimu okukyebera omugyenzi Henry Katanga, ey’omukazi we Molly Katanga n’eshagama eyashangirwe aha bizibiti ebyashangirwe aha mwanya ogu Henry yayitiirweho nibyorekyera kimwe ngu eshagama egyo n’eya Molly Katanga.

Henry akaitirwa omu maka gaabo ahari Chwa II Road omuri Mbuya, Nakawa Divijoni omu rurembo Kampala. 

Eki kizireho bwanyima y’aba Purida babakitabarizibwa kugambira kooti ngu aba Pooriisi abahikire aha mwanya ogu Henry Katanga yayitiirweho bakahandiika obujurizi nibo bahikire kwija kujurira omu kooti omu mushango ogu.

Omuramuzi Isaac Muwata ayongiireyo omushango ogu kuhisya ebiro 10.09.2024 obu gurikwija kugarukamu kuhurirwa.

#WestUpdates