Abanyabuzaare bategyereize kutunga emibiri y'abaana baabo...(Photo by Samuel Amanyire)

Gavumenti ehaireyo emitumbi 3 ey’abeegi abaitsirwe aba ADF

N’ebya Samuel Amanyire

KASESE 

Gavumenti ehaireyo emitumbi eshatu y’abeegi abaitsirwe abahekyera ba ADF ah’eishomero erya Mpondwe-Lhubiriha omuri Kasese abanyabuzaare kutebeekanisa okuziika.

Okuhayo emitumbi y’abeegi aba kukozirwe nyomwabazyo ah’eirwariro erya Bwera omu tauni kanso ya Mpondwe-Lhubiriha omu disiturikiti ya Kasese. 

Gavumenti ekaba yahaireyo emitumbi 11 ahabiro 27/6/2023 bwanyima y’okukyebera DNA.

Abakazi barikucura ah'eirwariro erya Bwera..(Photo by Samuel Amanyire)

Amina Rashid, omweegi ahabeegi ababuziibweho, omubiri gwe gukazoorwa aba UPDF omu ihamba erya Virungu National Park omuri DR Congo.

Jimmy Lebu, ishenkuru w’omwana ogu naagira ngu nk’eka baruhukire kandi nibaija kuziika Rashid omukitiinisa hati.

Godfrey Kabbyanga arikugambaho n'abanyabuzaare b'abeegi abaitsirwe..(Photo by Samuel Amanyire)

Yowasi Museveni, omutuura wa tauni kanso eya Kinyamaseke asiimire gavumenti ahabw’okubaha omutumbi gw’omwana waabo agumize ngu ekiika kyabo nikishaba abarikuba bafiire kuziikwa omu irimbo ry’eka nk’omugyenzo.

Beitu Godfrey Kabbyanga, Minisita w’eihanga w’ebya tekinologiya ashoboreire ngu okukyererwa okukyebera DNA kuretsirweho abantu baingi kwija kukyebeza kushaniriza n’abeegi abaitsirwe.

Lebu Jimmy, ishenkuru w'omwe ahabeegi ababaire babuuzibweho...(Photo by Samuel Amanyire)

Eki nikijaho bwanyima y’abahekyera ba ADF kutaahirira eishomero rya Mpondwe-Lhubiriha Secondary ahabiro 16/6/2023 bakaita abantu barengire omuri 40, na munonga abeegi. Ahabeegi aba, 17 bakookibwa omu buraaro bw’aboojo kandi baremwa okumanywa nikwo gavumenti kushaba okubakyebera DNA.

#WestUpdates