Pooriisi erikutwara omutumbi gw'omushaija oitsirwe ahabw'okuteekateekaho kuba omushuma w'omwani.Photo by Philip Murangira.

N’ebya Philip Murangira

KYEGEGWA

Abatuura abatakamanyirwe kuruga omu kyaro kya Kyempura omu muruka gwa Kihamba omu gomborora ya Kabweza omu disiturikiti ya Kyegegwa akasheeshe k'eriizooba batwarira amateeka omu ngaro baita omutuura mutaahi waabo ahabw’okumuteekatekaho kuba aibire omwani gwa mutaahi waabo. Omugyenzi yamanywa nka Francis Karatunga, 38.

Abatuura nibagira ngu omugyenzi abaire ari omwe aha kikoosi ky’abatsigazi enyangariize abatuura b’omu kyaro eki ahabw’obushuma.

James Rubareeba, ceeyamaani w’ekyaro kya Kyempura nagira ngu nyomwebazyo Karatunga bamukwatsire n'omwani gwa Rashid ogu ashoromire omu musiri ny’ekiro nikwo kumuretera Pooriisi akairuka akeshereka omu mabaare.

Nagira ngu ku bwasheesha nikwo abatuura kumugwera bakamukwata bakamuteera bakamwita.

Rubareeba nayongyera agira ngu omugyenzi aine ekikoosi ky’abantu bana abanyangariize ekyaro kandi aba barimu; Benard orikubakurira kandi obwa hati oyesherekire, David murumuna w'omugyezi obwa hati ori omu kihome aha Pooriisi ya Kyegegwa hamwe na Bagambaki nawe ori omu kihome.

Pasikaari Ndimwami, Ishe w'omugyezi nawe yahika ahi baitira omutabani kandi ogu yareebwa arikugira ngu omutabani abaire amuruhize n'obushuma.

Yagira ngu enyimaho, bakamwibira embuzi 9, yamuha eitaka yariguza ngu kandi nawe abaire namuraganiise kwija kumucumita.

Pooriisi yahika aha mwanya nikwo kwihaho omutumbi ekagutwara omu kabafu ah’eirwariro erya Kyegegwa kandi yagira ngu okucondooza kuriyo nikugyenda omu maisho.

#WestUpdates