Motoka ya mini bus ahi abantu 10 b'eka emwe baahwerekyerera omuri Kyenjojo. PHOTO: Philip Murangira

Philip Murangira
Abantu 15 b'eka emwe batunga butandu, 10 bafereho bwanyima ya Taxi Drone ehandiikirwe omu namba UBR 812G kushengurana buso-bwa-ntama na Bus y'ekika kya Pokopoko ehandiikirwe omu namba UBE 807T ahankuuto ya Fortpotal kuza Kampala omu disiturikiti ya Kyenjojo omu tauni ya Kaihura.

Butandu egi yabaho akasheshe k'erizooba ahagati ya shaha ikumi ni ikumi n'emwe.

Abaafa ni Byarugaba James, Tumwine James, Bamuhiiga Pio, Kamureba Najera, Noreda, Machati Deus, Rugurira, Rwobukyenkye, Mushijja Moses hamwe na dureeva wa Taxi owamanywa nka Mugume Moses.

Bus ya Poko Poko erikukururwa kuruga ahamwanya gwa butandu omuri Kyenjojo. PHOTO: Philip Murangira

Kandi abaahona ni Nsinikweri Medard, Natuhwera Benjamin hamwe na Tumwijukye Fatima boona baaba bari ab'eka emwe.

Aba baaba nibaruga omukyaro kya Kishami omugombora ya Kishami omu disiturikiti ya Ntugamo Kandi baba nibaza kuziika omunyabuzaare waabo omukyaro kya Kitega omugombora ya Bufunjo omu disiturikiti ya Kyenjojo.

Butandu egi yaaba omu tauni ya Kaihura omu disiturikiti ya Kyenjojo ahankuuto ya Fortpotal kuza  Kampala.

Abatuura nibagira ngu butandu zibaire butandu omumwanya ogu.

SP Vincent Twesige omugambirizi wa poorisi y'ekyanga ekya Rwenzori West yaahamya amakuru aga arikurabira ahamukura gwa WhatsApp kandi yaagira ngu butandu egi yarugiirira ahari dureeva wa Taxi owaaba naavugisa ekimama nikwo kushengurana na Bus reero abashaabazi aba Taxi bakahwerekyerera.

Emibiri y'abagyenzi yatwarwa omuk'abafu ah'eirwariro rya Kyenjojo kandi bo abatunga obuhuta batwarwa omumarwariro; Buhinga Regional Referral Hospital hamwe na Kyenjojo Hospital. 
#WestUpdates