Ehururu y’okwerinda za butandu z’ahanguuto etongoziibweho omuri Sheema. Photo by Bruno Mugizi.

N’ebya Bruno Mugizi

Ekitongore kya Pooriisi y’eby'ahanguuto omu disiturikiti eya Sheema kikwataniise n’ekitongore ekitari kya gavumenti ekya Sheema Accidents Volunteer kitandikire ehururu y’okushomesa abarikukoresa enguuto kubaasa kwerinda za butandu omu bwire bw’ebiro bikuru.

Ehururu egi erikuza kumara ameezi 2 neija kuhendera okwezi kw’okubanza, 2024 egyendereire kukyendeza za butandu z’ahanguuto omu disiturikiti egi omu bwire bwa Noohiri.

Arikushomesa abantu ahahururu egi aha kanisa ya St.Emmanuel Church Kabwohe Munisiparite, Mugisha Canishius, orikukurira Pooriisi y’eby'ahanguuto omuri Sheema ashabire abantu okuza aha buzoora maisho omu bwire bw’ebiro bikuru.

Omu bigambo bye, Rev. Johnson Aryajunabo - mukuru w’ekitongore ekya Sheema Accidents Volunteers ashabire abanyadiini okwebembera omuranga ogu kandi bakahabura abaikiriza abarikwija omu maramizo gaabo aha kabi akari omuri za butandu.

Nagira ngu abantu baingi bagwire omuri za butandu ezirikukira kubaho kandi ezirikureetwa emivugire mibi, abantu okuvuga basinzire, okuvugisa ekimama n'obwira burengire n’ebindi.

#WestUpdates