America, Uganda kukwatanisa omukuhendera orutaro rwa DRC...-Ambassada Popp

N’ebya Omushaki Waitu

Entumwa ya America omu Uganda, William W. Popp naagira ngu America eyeheireyo okuhwera okuhendera orutaro omu eihanga erya Democratic Republic of Congo.

Popp naagira ngu America eriyo nekora na Gavumenti nyingi aharimu Uganda okuhwera okugiraho ebiganiiro by’okureeba oku bakuhendera orutaro namunonga omu Burigw’eizooba bw’eihanga erya Congo.

Ebi abigambire ahamukoro kw’okujaguza emyaka 248 y’okwetegyeka kwa America ekoreirwe ahakitebe kikuru kya America omuri Kampala nyomwabazyo.

Omukoro ogu gubeire gurimu n’okujaguza emyaka 61 kwiha America etandika kukwatanisa na Uganda, omukago ogubatandikire n’okwombeka ekitebe kyabo omuri Kampala omumwaka 1962.

Ahamukoro ogu, Popp agiizire ngu ekigyendererwa kyabo n’okureetaho obusingye, okurinda abantu n’okuhwera empungi abarikuhunga omumaka gaabo.

Ogu akyorekire ngu America neija kugumizamu n’okurindana amagara g’abanya Uganda, okutangira endwara, okurwanisa obwooro, okutaho emirimo n’okutunguura eby’esente n’entaasya ya Uganda.

#WestUpdates
#RadioWestAt25