Babiri kukomwa amagara gaabo goona ahabw’obwitsi.

N’ebya Omushaki weitu

RUKUNGIRI

Abashaija babiri b’enyin’emwe omu disiturikiti eya Rukungiri nibeija kukomwa amagara gaabo goona omu kihome ahabw’okwita nyinabo na munyanya bo ahabw’enshonga z’eitaka. 

Banyakuheebwa ekifubiro ni; John Ngabirano, 26 na Keresi Amanyire, 30. 

Barikubaheereza ekifubiro, kooti ejurirwamu ebaire ekuriirwe omuhwezi wa ishabaramuzi Richard Buteera n’abandi baramuzi babiri Christopher Gashirabake na Oscar Kihika egizire ngu ababiri aba basingisiibwe omushango gw’okwita abantu babiri kandi ngu babaire baine kuheebwa ekifubiro kihango ahabw’omuringo ogu baitsiremu nyinabo na munyanya bo.

Abaramuzi bacwiremu ngu ababiri Ngabirano na Amanyire baine kuheebwa ekifubiro ky’okukomwa amagara gaabo ngu ahabw’okuba bakaba basingisiibwe omushango gw’okutiniisiriza abagyenzi kandi ku baabarekwire bati, bagumizamu nibabatiniisiriza okuhisya ahi baabitiire. 

Ebihandiiko bya kooti nibyoreka ngu ahabiro 29.11.2011, Dinah Bainengera na Doreen Musiimenta bakataahirirwa ababiri aba, babiita babaziika omu kiina kya kamina basangirano emitumba n’eitaka. 

John Ngabirano na Keresi Amanyire bakaba batwire nibarwanira eitaka n’abagyenzi kumara obwire buringwa.

#WestUpdates