NewVision Reporter 
Omushaija owaatoroboize omuhara akamusiga siriimu acweriirwe kukomwa emyaka 32.
N’ebya Omushaki weitu
KALANGALA
Omushaija acweriirwe okukomwa emyaka 32 omukihome ahabw’okutoroboza omuhara w’emyaka 12 akamuturiza siriimu.
Abaramuzi bashatu; Hellen Obura, Christopher Gashirabake na Eva Luswata aba kooti ejurirwamu nibo bacweriire Charles Wasswa Kaweesi okukomwa emyaka 32 aha biro 08.05.2025.
Omuramuzi wa kooti enkuru, John Eudes Keitirima akabanza kucwera Kaweesi okukomwa emyaka 40 beitu bwanyima ya Kaweesi kujuriza ekifubiro eki, abaramuzi aba kooti ejurirwamu bakyendeerize ekifubiro ekyabaire kimuhairwe basharamu ngu akomwe emyaka 32.
Abaramuzi aba 3 bagizire ngu Kaweesi tasiisire bwire bwa kooti bwanyima y’okwikiriza kuba yakozire omushango ogu.
Abahababi nibagira ngu ahabiro 19.07.2014, omu kyaro ekya Kibaale omu disiturikiti eya Kalangala, Kaweesi akabyama n’omuhara omu by’omubonano arikukimanya ngu arwire nikwo kuhendera amusigire akakooko ka siriimu.
#WestUpdates
