Enshonga z’eitaka ry’abatuura ba Rwobunyonyi

Enshonga z’eitaka ry’abatuura ba Rwobunyonyi

N’ebya Ambrose Niwagaba Katoto

HOIMA:

Ab'eby'okwerinda omu disiturikiti ya Hoima bari aha muhiigo gw'okuronda abakuumi b'eitaka abateire amasasi obu Minisita w’eihanga ow’eby’amataka, Dr. Sam Mayanja abeire narambuzibwa eitaka eri abatuura ba Rwobunyonyi barikutongaanira n'orikugyira ngu aine ekyaapa kyaryo.

Habeireho akatangaaro omugomborora ya Buraru omu disiturikiti ya Hoima obu abakuumi ba Kampuni etamanyirwe bateire amasasi ashatu (3) bwanyima ya Minisita w’eihanga ow’eby’amataka, Dr Sam Mayanja okuza okurambura eitaka eri abatuura ba Rwobunyonyi barikutongaanira na Fred Kiiza Mugamba, orikugyira ngu aine ekyaapa ky'eitaka.

Minisita Mayanja abeire aine ab'eby'okwerinda boona abarimu RDC Rogers Mbabazi, omuhwezi we Micheal Kyakashari, DPC Jackson Bogere hamwe n'abandi.

Eitaka rya Rwobunyonyi ririho abatuura abari omumaka agarikurenga 1000 beitu entongane ezitwireho zikarugyiriraho abantu okurihungamu ah'abw'okwitwa kw'abantu 2 hamwe n'okwosya emotoka y'ababeire nibatekateekwaho okuba abashuma b’eitaka.

Minisita Mayanja aragiire ngu abakuumi batagarurwa omu eitaka eri kandi ngu ebiragiro bye bitekwemu ekitiinisa bikorwe bitahakanisiibwe.

Minisita Sam Mayanja atakagire Rwobunyonyi abandize okutaaha omuntongane z'eitaka rya hectares 405 Block 9 Plot 7 omuri Bughaya eri abatuura b'ebyaro bibiri ekya Dwoli Kinyara LC1 na Dwoli East omugomborora ya Kitoba bariyo nibatongaanira n’eka y'owabaire ari omuhwezi w'enganzi y'eihanga Henry Muganwa Kajura.

Minisita aragiire okushazibwamu ebyaapa bibiri ebi ab’eka ya Kajura batungyire omugwa 2007 hamwe na 2020 reero ngu basigaze ekyakozirwe 1971, eki gavumenti erikuza okubaguraho okuhereza abatuura ebyaapa byaabo.

Entongaane z'eitaka omuri Bunyoro kikahinduka ekyeshongoro haihi buriizooba abantu nibatunga abarikwenda okubabinga ah'eitaka namunonga omu disiturikiti ya Kikuube hamwe na Hoima.

#WestUpdates