Dr. Sharif Mutabazi nagira ngu abantu okwerindira omu nganda zaabo nikibahwera okukwatanisa, okukorera hamwe, okuhaburana n’okwejumbira omu bintu ebirikubatunguura. Photo: Abdulkarim Ssengendo.

Abdukarim Ssengendo

MBARARA

Abatuura b’omu kyanga ekya Ankole na Uganda yoona nibashabwa kukoresa gye enganda (clans) zaabo kureeta entunguuka omu eihanga.

Okushaba oku kuhairweyo Dr. Sharif Mutabazi- mukuru w’ekigombe ky’abasingo ekya Greater Ankole Abasingo Club.

Dr. Mutabazi ahaireyo okushaba oku nyomwabazyo aha Sande obu abaire nagambira ba memba b’ekigombe eki abetabire omu rukiiko rw’okuhendera omwaka orubaire omuri Booma omu rurembo rwa Mbarara.

Nagira ngu abantu okwerindira omu nganda zaabo nikibahwera okukwatanisa, okukorera hamwe, okuhaburana n’okwejumbira omu bintu ebirikubatunguura.

Hoona nabwo, abakazi n’eminyeto nibashabwa kwejumbira omu nkora y’okumanya enganda zaabo.

Abasingo n’oruganda orwakomokire Ethiopia. Bakijja beebembirwe omucwezi Muhigi, owabaire ari omugabe w’Abasingo abaizire bakazingura Ssembabule ahari Bigo bya Mugyenyi.

#WestUpdates