Gavumenti eragiire abashaho aba “pre-intern” kugaruka ahamirimo yaabo.

N’ebya John Masaba 

Minisiture y’eby’amagara eshabire abeegi abarikushoma obushaho barikwegyezamu bete “medical interns” okugaruka aha mirimo yaabo beitu ekyorekire ngu tihariho kuhamibwa kwona okw’obusiimo bwabo “Allowances”.

Minisiture negira ngu ekiretsireho eki n’ahabw’okugira ngu minisiture teine sente z’okubashashura.

Okurugiirira ahari Dr. Diana Atwine- Omuhandiiki w’entuura omu minisiture, abashaho aba bashemereire kugaruka aha mirimo yaabo obwo bategyeriize eki minisiture y’eby’esente eragambire minisiture y’eby’amagara aha nshonga y’esente.

Abashaho abarikushoma barikwegyezamu batwire aha kediimo kaabo kuruga omwaka oguhwaire ahabw’obutashashurwa. 

N’obu abashaho aba barikushaba ngu esente zaabo zongyerweho kuhika ahari miriyooni 2.5 nk’oku Purezidenti Museveni yaaragiire, minisiture negira ngu nebaasa kubashashura shiringi 750,000 zonka.

Beitu hoona, ekigombe ekirikugaita abashaho ekya Uganda Medical Association (UMA) kyangiire ekiteiso kya minisiture ngu ahabw’okuba nikibuzabuza okurugiirira aha muhandiiki mukuru w’ekigombe eki, Dr. Herbert Luswata.

#WestUpdates