Omuhandiki w'entuura omu minisiture y'eby'amagara, Dr. Diana Atwine ari n'abeebembezi abahikire omu mushomo gw'eby'obutiimba bw'ensiri aha Dream Wood, Mbarara ebiro 29/08/2023. PHOTO: Ali Wasswa.

N’ebya Ali Wasswa

MBARARA

Omuhandiiki w’entuura omu minisiture y’eby’amagara, Dr. Diana Atwine arabwire abeebembezi obutajwazya eby’obutegyeki omuhururu z’okurwanisa endwara ezirikuruga omu burofa.

Dr. Atwiine agambire ebi omu mushomo gw’okushwijuma n’okushomesa abeebembezi ahari puroguraamu y’okugaba obutiimba bw’ensiri eri omu eihanga ryoona ogubaire ahari Dream Wood Suites omu rurembo rwa Mbarara Orwakabiri ebiro 29/08/2023.

Ajumiriire abeebembezi abatarikufayo ahaby’obuyonja bw’abantu abu barikwebembera.

Omu mushomo nigwo gumwe, Dr. Atwine arabwire abanya-Uganda abarikukores kubi obutiimba bw’ensiri obu gavumenti erikubaheereza arikugira ngu nibo baremiise okurwanisa omushwija gw’ensiri omu eihanga. 

Naagira ngu abantu abamwe nibakoresa obutiimba obu kujuba eby’enyanja, okubukoramu emiguha y’okusibika embuzi n’agandi matungo, okubwombekyesa ebiju by’enkoko n’ebindi.

Omushomo ogu gwetabirwemu za disiturikiti 17 kuruga omuri Burengyerwa-Izooba hamwe na zimwe ez’omuri Buganda omuri Mpigi, Kyankwanzi na Kiboga.

Abeebembezi abetabire omu mushomo ogu bashabire gavumenti okwongyera amaani omu kushomesa abantu aha mugasho gw’okuraara omu butiimba bw’ensiri.

#WestUpdates