Omuhandiiki w'entuura omu minisiture ya gavumenti z'ebyanga, Ben Kumumanya. PHOTO: Isaac Nuwagaba.

Gavumenti kwombeka obutare 18 omuri Uganda.

N’ebya Isaac Nuwagaba

Minisiture ya gavumenti z’ebyanga negira ngu ehendiire ebirikwetengwa byona kutandiika kwombeka obutare 18 omu myanya y’etauni omu Uganda.

Ebi bibaire biri omu rupoota ya minisiture ey’okushwijuma n’okureeba ebiteirwe omunkora omu manifesto ya NRM, okubaire omu ofiisi ya Purezidenti nyomwebazyo.

Okurugiirira aha muhandiiki w’entuura omu minisiture, Ben Kumumanya- obutare omu Uganda nibuhwera kutaho emihendo y’ebintu n’okukanyisa aha ntaasya y’eihanga.

Obutare obu nibwija kwombekwa omu myanya nka;
 
Nyahuka tauni kanso omuri Bundibugyo disiturikiti n’omuri za munisiparite nk’eya: Koboko, Nebbi, Kapchorwa, Kumi, Kotido, Bugiri, Iganga, Mubende na Njeru.

Obundi nibwija kwombekwa omuri Masindi, Bushenyi- Ishaka, Kisoro, Ntungamo, Rukungiri, Ibanda, Mpigi tauni kanso n’omuri Kibaale disiturikiti.

Kumumanya nakyoreka ngu obutare nibwija kuheereza abashuubuzi 18,000 emirimo n’abakozi abandi.

Minisiture yaaherize kwombeka n’okumarira obutare 12 obwahati oburikukora kandi buri omuri za disiturikiti nk’eya; Mbarara, Kasese, Arua, Moroto, Soroti, Tororo, Busia, Lugazi, Masaka, Kitoro-Entebbe na Kitgum.

Kwongyerera aha kwombeka obutare obu, minisiture eguzire ebimotoka 12 by’okushomba kasasiro kubaasa kuteereza eby’obwecumi omu ndembo z’etauni.

 “Minisiture eriyo neyombeka obutare obundi 11 omu miruka nk’ogwa Rwengaju omu Kabarole disiturikiti , Butiti omuri Kyenjojo, Kibito trading centre omuri Bunyangabu, Kibuku, Gomba, Nakaseke na Ntoroko disiturikiti.

#WestUpdates