GISO wa Butiaba akomirwe ahabw’okuyambaho abarikugambwaho okunyaga eitaka...(Photo by Ambrose Nuwagaba Katoto)

N’ebya Ambrose Niwagaba Katoto

Buliisa:

Minisita w’eihanga ow’eby’amataka, Dr. Sam Mayanja aragiire okukomwa kwa GISO wa Butiaba omu disiturikiti ya Buliisa.

Eki kyeizireho bwanyima y’abatuura ba Wantembo na Boma okumuheerezaho obwamushinja ku niwe arikuyamba abarikugambwaho okuba abanyagyi b’eitaka rya Wantembo.

Minisita Dr. Sam Mayanja obeire ari n’omuhwezi wa Purezidenti ow’enshonga ez’omutaano, Phionah Barungyi abugeineho abatuura ba Wantembo na Boma omuri Butiaba omu disiturikiti ya Buliisa abarikweterera enduuru ahabw’omugaiga orikugambwaho okuba Francis Kahwa orikwenda okubanyagaho eitaka rya Community eririkuhisya hiika 1,700.

Abatuura bamugambire ngu omwami Rugongeza Hanington ori GISO wa Butiaba okumara emyaka erikurenga omuri 25 niwe ababurize obusingye nawe nikwo okuragiira ngu bamukwate.

Abatuura bashomiire Minisita riipota erikworeka ku ebizibu ah’eitaka byatandikyire ahabw’emirimo y’okutimba amajuta.

Eitaka eriri kugambwaho abatuura bakaheerezaho Purezidenti Museveni rimwe ah’eitaka yayombekaho barakisi y’amahe.

Minisita ku arugyire Wantembo ahikyire ahari Kampu erikuturwamu abantu ababingyiwe omu eitaka rya Bukinda na Katikara omu disiturikiti ya Kikuube.

Omu Kampu egyi, Minisita Mayanja ahuumurize abantu aba yabashaba bakore ekihandiiko eki ariije okutwara owa Mukuru w’eihanga.

#WestUpdates