Omurukiiko oru, Baryomunsi agizire ngu, ekitongore eky’obwa Purezidenti bakahayo ekihandiiko ky’okukuza oku kandi hoona ekyaikiriziibwe.

N’ebya John Masaba

Gavumenti ecweiremu kukoresa disiturikiti ya Gomba nk’omwanya ogurikuza kukorerwamu emikoro y’okukuza ekiro ky’amamanzi omwaka ogu.

Minisita w’ebya kanyabwengye n’okuhabura eihanga, Dr. Chris Baryomunsi, aharwakashatu obu abaire nagambaho n’abanyamakuru ahari Uganda Media Centre omuri Kampala, agizire ngu okukuza ekiro ky’amamanzi nikwija kuba ahari Kasooli omugomborora ya Mpenja aha Sande ebiro 09.06.2024

Agizire ngu omwanya gw’okukurizamu ekiro eki gukahaajaanwaho omurukiiko rwa ‘cabinet’ orwabaire rwebembeirwe mukuru w’eihanga, Yoweri Museveni, omumaka g’obwa Purezidenti omuri Entebbe, aharw’okubanza ebiro 13.05.2024. 

Omurukiiko oru, Baryomunsi agizire ngu, ekitongore eky’obwa Purezidenti bakahayo ekihandiiko ky’okukuza oku kandi hoona ekyaikiriziibwe.

Kurugiirira ahari Minisita, ebindi ebyagaaniirweho aharwokubanza bikaba birimu enkora ekwatiraine n’enkuza y’abaana bato jamwe n’okuhandiika busya abantu abarikuza kutunga endanga-muntu z’eihanga. 

Omukoro gw’okujaguza

Minisita agizire ngu minisita mutaahi we kandi hoona ow’nshonga z’obwa Purezidenti, Milly Babalanda, hamwe n’abarikujunaanwa ahakutebeekanisa eby’okukuza ekiro ky’amamanzi, nibaija kugamba ebirikukiraho, bwanyima, ahantebeekanisa ezi.

“Twine amatsiko ngu abanya Uganda baingi nibaija kwija kwejumba omumukoro ogu ogurikugamba ahabyafaayo by’eihanga ryaitu,” Baryomunsi nikwo agizire.

Gavumenti neekuza ekiro eki buri biro 09 okwezi kwa 6, barikwijuka amamanzi g’ekibiina kya NRM abaabeire bari omurutaro rw’okuzaahuura eihanga abaabandize kufeera omukurwana omuri Kikandwa, disiturikiti ya Luweero omugwa 1981.  

Omwanya ogu gukakora omurimo gw’amaani omurutaro rw’abaheekyera orwamazire emyaka 5 orwaareetsire Purezidenti Museveni yaaza omubwebembezi.

Ekiro eki nikikora nk’ekiijusyo ahabantu abariho obwa hati n’abariija ahamugasho gw’okugira obumanzi, obugumisiriza hamwe n’okwehayo kuheereza eihanga.

Omwaka oguhwaire, omukoro gw’okukuza ekiro eki, gukaba omuri Luwero ahakishaayi kya Kasaala omugomborora ya Butuntumula ahamutwe ogwabeire niguhiga abanya Uganda kwimuka bakareeba ebijuma by’okwehayo kw’amamanzi aga.

#WestUpdates