Orikukurira eby’okuteeza akaruuru omuri Kisoro, Dan Nayebare niwe arangiriirwe Grace Ngabirano Akifeza nk’osingire akaruuru ka Kisoro. PHOTOS by Electoral Commission.

N’ebya Job Namanya

KISORO

Grace Ngabirano Akifeza, obaire ayetsimbireho nkotiine kigombe omu karuuru k’okugarukamu kutoorana Omuny’ishengyero-kazi wa disiturikiti ya Kisoro arangiriirwe nkosingire akaruuru akateirwe ebiro 14.11.2024.

Orikukurira eby’okuteeza akaruuru omuri Kisoro, Dan Nayebare niwe arangiriirwe Grace Ngabirano Akifeza nk’omusinguzi.

Akifeza asingire n’oburuuru 50,459 nikwo kusinga Rose Kabagyenyi owa NRM obaire owa kabiri n’oburuuru 44,982. Salim Sultana owa NUP abaire owa kashatu n’oburuuru 903, Meble Ingabire owa UPC yayihayo oburuuru 362, Juliet Musanase owa FDC eya Najjanankumbi abaire owa kataano n’oburuuru 193 kandi oshembire ni Aisha Cyimpaye oihireyo oburuuru 157.

Bwanyima y’okurangirirwa nk’omusinguzi, Akifeza asiimire abantu ba Kisoro ahabw’okumushagika bakamukwasa entebe egi kandi araganiise kutaho entebeekanisa y’okugarukanisa abateezi b’akaruuru boona abakubaasa kuba barugire omu karuuru aka baine enzika.

Akifeza agizire ngu naija kushakira abantu ba Kisoro kureeba ngu batunguka purogyekiti z’entunguuka. 

Justice Simon Mugenyi Byabakama, mukuru w’akakiiko k’eby’oburuuru naagira ngu akaruuru tikabiiremu mivuyo y’amaani oihireho akavuyo akabaire aha mwanya gw’okuteereraho akaruuru ogwa Busanani Polling station omu gombora eya Busanza omu eishaza erya Bufumbira ahi Hon. John Ninzeyimana Kamara ahikireho shaaha 5 z’akasheeshe atyo akaabinga abateezi b’akaruuru boona, akakwata akatabo k’obukongi bw’akaruuru akatandika kukyebera oburuuru arikwibira Kabagyeni.

Akifeza agizire ngu naija kushakira abantu ba Kisoro kureeba ngu batunguka purogyekiti z’entunguuka.

Byabakama ashabire Pooriisi okugumizamu necondooza enshonga egi kwenda kutangira akavuyo akandi n’okwiba akaruuru omu bwire bw’akaruuru. Nabwo, ashabire abantu okurinda obusingye omu karuuru ka boona akarikuza kuteerwa 2026.

Kabagyeni n’abandi ababaire betsimbireho tibahikire aha mwanya ogu baire nigubarirwaho akaruuru. 

Akifeza akasingwa Kabagyeni omu karuuru ka NRM ak’okutoorana omukwasi w’ebendera nikwo kusharamu kwetsimbaho nkotiine kigombe.

Ceeyamaani w’ekigombe kya NRM omuri Kisoro, Dr. Philemon Mateke owayangire kuhagira omukwasi w’ebendera ya NRM Rose Kabagyeni arikugira ngu akasinga omu muringo gw’ekishobobo nawe abaire ariho aha kurangiirira Akifeza nk’omusinguzi.

Grace Ngabirano Akifeza naija kuza omu bigyere by’omugyenzi Sarah Mateke Nyirabashitsi owabaire ari omuntebe egyo owafiire omu kwezi kwa 9, 2024.

#WestUpdates