Minisita w'enshonga za Karamoja, Goretti Kitutu naagira ngu bakamushangira aha maisho bamuvuga siipidi y’amaani kumutwara Kayunga obu akwatwa.

N’ebya Michael Odeng 

Kooti erikurwanisa obushomankuzi omuri Kololo, Kampala nyencakare Orwakabiri neija kuhurira omushango ogu minisita w’enshonga za Karamoja, Mary Goretti Kitutu orikujunanwa okubuzabuza amabaati, yahababire ngu bakamutuuntuza oteireho n’okumuzibira kureeba ba Puriida be.

Kitutu, nabwo ori Omuny’ishengyero-kazi wa disiturikiti eya Manafwa akateebwaho omushango na munyanya, Michael Kitutu Naboya hamwe n’omuhwezi we omu by’obutegyeki, Joshua Abaho.

Minisita Kitutu najunaanwa okubuzabuza amabaati agabaire gari ag’okuheebwa abantu ba Karamoja kandi we munyanya, Naboya nateekateekwaho kuba yayaakiire amabaati g’enyibano. Abaho najunaanwa omushango gw’obushomankuzi.

Orwakana orwa wiiki ehwaire, Omuramuzi Jane Okuo Kajuga agizire ngu ebirarugye omu mushango gwa Kitutu ogw’okuribatirira obugabe bwe nibyo birikwija kucwamu omushango gw’amabaati.

Omu mushango gwe, Minisita naagira ngu bakamushangira aha maisho bamuvuga siipidi y’amaani kumutwara Kayunga obu akwatwa.

Kitutu naagira ngu ahabiro 14/04/2023 akakwatwa, yaatinisirizibwa kandi yaazibirwa kureeba ba puriida be eki arikugira ngu bakaribatirira obugabe bwe.

Nayenda omushango gw’amabaati ogu arikujunaanwa omu kooti erikurwanisa obushomankuzi omuri Kololo gubingwe.

Beitu, Pooriisi nehakanisa ebirikugambwa obwo ASP Juliet Mutuwa, owabaire nakora aha Paramenti arikugira ngu omushango gwa Kitutu ogu ahababire gugyenderiire kushiisha eiziina rya Pooriisi kandi ngu ebi arikugamba n’ebishuba.

#WestUpdates