Minisita wiehanga ow'eby'esente, Amos Lugoloobi.

N’ebya Michael Odeng

Orikujunanizibwa aha bintu omu ofiisi y’enganzi y’eihanga ahaire obujurizi omu kooti kandi agizire ngu minisita w’eihanga ow’eby’esente, Amos Lugoloobi akagaruzayo amabaati 600 agabaire gari ag’abantu b’omu kyanga ekya Karamoja.

Aharwakana, Fredrick Kalema agambiire kooti erikurwanisa obushomankuzi ebaire ekuriirwe Omuramuzi Margret Tibulya ngu minisita akagaruzayo amabaati omu mabikiro gaabo omuri Namanve omu disiturikiti eya Mukono arikugyendera aha kiragiro kya Purezidenti Yoweri Museveni.

Kalema nabwo agambire ba minisita hamwe n’abany’ishengyero abaayakiire amabaati beitu bakagagarurayo abarimu n’enganzi y’eihanga, Robinah Nabbanja.

Okurugiirira ahari Fredrick Kalema, abanda abaatwire amabaati bakagagaruzayo ni; minisita w’eihanga ow’enshonga z’amahe, Jacob Oboth Oboth, omuhwezi w’enganzi y’eihanga owa kashatu, Rukia Nakadama, minisita w’enshonga za Karamoja, Mary Goretti Kitutu hamwe na Minisita w’eby’esente, Matia Kasaija.

“Lugoloobi hamwe n’abandi bakakuratira okuragira kwa Museveni kandi amabaati agu babaire batwire bakagagaruza omu ofiisi y’enganzi y’eihanga, Kalema arikugambira kooti.

Kalema nabwo agizire ngu Lugoloobi akakiira amabaati 600 omu bicweka 2, obwo arikutunga amabaati 300 buri kicweka.

Agizire ngu minisita akatunga ekicweka ky’okubanza ky’amabaati 3000 kuruga omu ofiisi y’enganzi y’eihanga ahabiro 15/07/2022 ahansi ya Voucher number 8058 kandi ekicweka ekya kabiri akakitwara ebiro 01/02/2023 ahansi ya voucher number 8527.
 
Lugoloobi, nabwo ori Omuny’ishengyero wa Ntenjeru North najunaanwa emishango 2 eine akakwate n’okutwara amabaati ga gavumenti ataine rusa kandi okurugiirira aha kiragiro ky’okurwanisa obushomankuzi omu Uganda, orikusingwa omushango ogu, ekifubiro ekirikukirayo kumuheebwa n’okukomwa emyaka 7 omu kihome.

Okurugiirira ahari Kalema, amabaati 9,000 aha gashohoziibwe nigo gatwirwe abakuru abo kandi amabaati 1,000 gonka nigo gayoheereziibwe omu kyanga ekya Karamoja.

Okuhurira omushango ogu nikugarukamu eriizooba Orwakataano.

#WestUpdates