Hausi Mbata (bumosho) na Titus Tugume (buryo) baine Seth Murari (rwagati) ahakugaaniiraho n'abanyamakuru ahari Golf Sports Club, Booma Mbarara eihangwe ry'eriizooba. PHOTO: Edwin Ram

N’ebya Gloria Webare na Ram Edwin, Mbarara City.

Abarwani rurangaanwa omumuzaano gw’ebikonde n’emigyere, Hausi Mbata na Titus Tugume eriizooba baahamya ku barikuza kusingura engamba zaabo ezi boorekyereire kwejumbamu Orwamukaaga oru.

Abarwani kandi abakugu omumuzaano ogurikumanywa nka ‘kickboxing’ nibaija kurwana ebiro 12.07.2025 aha Agip Motel omururembo Mbarara.

Hausi Mbata naija kuba naakwatana n’ondiijo muzaani w’ebikonde n’emigyere, Elvis Okello kuruga omu ihanga rya Kenya aharukoba orwa East & Central Africa kandi Titus Tugume naija kuba naakwatana Dheyongera Abdulatif kuruga omuri Busoga aharukoba orwa Africa.

Ssengonzi Asuman n’omujungu ou twamanyaho erya Andreas kuruga omu ihanga erya Hungary nibaija kuba nibariitanira orukoba orw’aharurengo rw’ensi yoona ninga shi World Title.



Barikwetebeekanisiza eizooba eri, abashagiki b’abarwani aba baayegaita n’abashagiki b’omwe omubeesimbire ahabwa Meeya bw’orurembo rwa Mbarara, Seth Murari, nikwo kutambura omururembo rwa Mbarara omu ihangwe ry’eriizooba barikurarika abantu ahabw’orugamba oru boorekyereire.

Kandi na bwanyima baakoraho okugaaniiraho n’abanyamakuru ahari Golf Sports Club akashozi Booma omururembo nirwo rumwe.

Seth Murari, ou manifesito ye erikwebembeza okushagika eminyeto okurimu okutunguura eby’emizaano omururembo rwa Mbarara, yaaha obukongi 50 bw’okureeba emizaano egi ahabantu 50 abarabanze kuhika ahari Agip Motel, Orwamukaaga.

#WestSports