Mao agizire ngu orutaayaayo rwe tirwine nshonga nikwo kuhakanisa amakuru agateirwe aha mikura ya Yintaneti ngu gubaire guri omukoro gw’okwanjura.

N’ebya Umar Kashaka

ENTEBBE

Minisita w’ebiragiro n’engyenderwaho, Norbert Mao, ataayaayire abazaire b’omwishiki otwire ari munywani we kumara obwire buringwa, Beatrice Kayanja,omuri Najjanankumbi aha ruguuto orwa Entebbe.

Mao, nabwo ori Purezidenti w’ekigombe ekya DP aha Sande (25/02/2024 abaire ashendekyereziibwe Omuhwezi wa Siipika wa Paramenti, Thomas Tayebwa hamwe n’omuny’ishengyero wa Mbarara City North, Dr. Robert Rukaari.

Ku abuziibwe, Mao agizire ngu orutaayaayo rwe tirwine nshonga nikwo kuhakanisa amakuru agateirwe aha mikura ya Yintaneti ngu gubaire guri omukoro gw’okwanjura. “ Kubaire kuri okutaayaayira abazaire, okwanjura nikwija kwija omu biro by’omu maisho omwaka ogu. Ogu n’omucwe gweitu, turi abeiraguju. Mao arikushoborera omunyamakuru weitu aha simu.

Beatrice, otwire ari omuhwezi wa Mao omu by’okucondooza akataana n’omushaija we, Martin Kayanja ou yabaire amazire nawe emyaka 25 bwanyima y’okushaba ngu bataane omu kooti y’eby’amaka omuri Makindye, Kampala omu kwezi kwa 2, 2021.

Beatrice akagambire kooti ngu Kayanja akaaba nakunda kutongana atarikumpeereza kitiinisa kandi emirundi mingi anjumira omu maisho g’abaana beitu n’omubantu. Kooti ekaikiriza okushaba kwe okw’okutaana n’omushaija we beitu encwamu ya kooti teramanyirwe omu bantu.

Ahabiro 18/12/2023, Beatrice akata ekishushani kye na Minisita Mao aha mukura gwa X ekyabaire nikyoreka akamwenyo aha maisho. 

#WestUpdates