Purezidenti agambire ebi aharwakataano ebiro 12.07.2024 omu kukingajo okweherera kwaba minisita, abahandiiki n’aba memba b’akakiiko aka CEC ak’ekigombe kya NRM aha faamu ye omuri Ngoma. PPU PHOTOS.

N’ebya Beth Akatukunda

KYANKWANZI

Purezidenti Yoweri Kaguta Museveni ashabire abeebembezi okwebembera ehururu y’okuhindura aha miteekateekyere y’abantu n’abeebembezi abarikutunguura eby’entaasya omu eihanga.

Purezidenti agambire ebi aharwakataano ebiro 12.07.2024 omu kukingajo okweherera kwaba minisita, abahandiiki n’aba memba b’akakiiko aka CEC ak’ekigombe kya NRM aha faamu ye omuri Ngoma. 

Okweherera oku kumazire ebiro 7 ah’eitendekyero ry’eby’obwebembezi ahari Kyankwanzi.

Purezidenti Museveni nabwo ashabire abetabire omu kweherera oku okushomesa n’okuhabura abanya-Uganda kwejumbira omu miringo y’omurembo omu kuriisa kwabo ahabw’okwenda kutunguura ekitongore eki.

Beitu, Purezidenti ashemereirwe munonga kushanga ngu ekizibu ky’endwara omu matungo nikiija kuba kitakiriho ahabw’okuba gavumenti eriyo neija kutandika ehururu y’okusirika amatungo goona emirundi ebiri omu mwaka.

Orikukurira abakozi ba gavumenti, Lucy Nakyobe asiimire Purezidenti Museveni ahabw’obushagiki bwe, obuhabuzi hamwe n’okuhika aha kweherera oku kuhabura abeebembezi.

Nakyobe nabwo akyorekire ngu omu kweherera oku, abetabire abahikire ahari Kyankwanzi bagambire eha nsonga ezirikuteeganisa abanya-Uganda kandi bagambire n’ekyakubaasa kukorwa kumaraho ebizibu ebyo n’okugira eihanga rirungi.

Omu bigambo bye, Kiryowa Kiwanuka oshomiire ebicwirwemu aha kweherera oku agizire ngi okweherera kwabo oku kwecumintirize munonga aha kurwanisa obushomankuzi n’enteebekanisa y’okureeba ngu bayejumbira omu bintu ebirabareetere esente obwo amaani garikuteebwa aha kwongyera omutindo omu bintu, eby’oby’obuhingi n’oburiisa ebirikurugwamu esente, eby’amakorero, tekinologiya n’ebindi.

Nabwo, bacwiremu kurwanisa obushomankuzi obweyongyeire n’okubinga abantu aha mataka omu buhendo biragiro omu eihanga.

#WestUpdates                     
#RadioWestAt25