Purezidenti Yoweri Museveni, entumwa ya Netherlands omu Uganda Frederieke Quispel ( Omukazi) n'abandi aha maka g'obwa Purezidenti, Entebbe aharwakataano ebiro 02.08.2024. PPU Photos.

N’ebya Omushaki Weitu

KAMPALA

Purezidenti Yoweri Museveni atungire ebihandiiko by’entumwa z’amahanga 4 eziheerize kutooranwa kwija omu Uganda.

Entumwa z’amahanga ezihaireyo ebihandiiko Orwakataano ebiro 02.08.2024 aha maka g’obwa Purezidenti harimu; Amokrane Mourad (Algeria), Joash Arthur Maangi (Kenya), Frederieke Quispel (Netherlands) na Mahlaba Almon Mamba (Eswatini).

Purezidenti Museveni ayakiire entumwa z’amahanga aga omu Uganda kandi abaraganiise kukorera hamwe nabo kuhamya omukaago ahagati ya Uganda n’amahanga gaabo agu barikurugamu.

Entumwa ya Kenya omu Uganda, Joash Maangi ahikize endaamusyo kuruga owa Purezidenti wa Kenya William Ruto ahari Purezidenti Museveni arikugira ngu amahanga aga abiri gatwire nigakwatanisa omu bintu baingi omuri n’eby’obushuubuzi.

Entumwa ya Kenya omu Uganda, Joash Maangi na Purezidenti Yoweri Museveni.

Maangi asiimire Purezidenti Museveni ahabw’okukunda Africa n’okureeba ngu amahanga goona gakwatanisa omu by’obushuubuzi.

Arikwakiira entumwa ya Algeria omu Uganda, Amokrane Mourad- Purezidenti Museveni agizire ngu ashemereirwe ahabw’okuhurira ngu Algeria eri omu magingo g’ahamuheru kutandika kugura ebintu bya Uganda nk’amate, amajaani n’omwani.

Entumwa ya Algeria omu Uganda, Amokrane Mourad na Purezidenti Museveni

Aha rubaju rwe, entumwa ya Algeria omu Uganda, Amokrane Mourad nawe ahikize Purezidenti Museveni endamusyo kuruga owa Purezidenti wa Algeria, Abdelmadjid Tebboune kandi agizire ngu ayetegwire kuhamya omukago ahagati ya Algeria na Uganda.

Ambasada wa Eswatini omu Uganda, Mamba nabwo orikushutama n’omuri Addis Ababa omu eihanga erya Ethiopia aretsire endamuusyo kuruga owa King Mswati III oriyo nayeteebekanisa kwija omu Uganda.

#WestUpdates