Siipika wa Paramenti, Anita Among Nalongo.

N’ebya Omushaki weitu

KAMPALA

Siipika wa Paramenti, Anitah Among Nalongo yagira ngu naija kubinga abany’ishengyero ab’orubaju oruhakani omu Paramenti abaragumizemu bangire kuza omushutamo za Paramenti ngu ahabw’okuba hariho enshonga z’okuribatirira obugabe bw’abantu ezitakakozirweho.

Siipika eriizooba Orwakabiri ebiro 14/11/2023 yagira ngu abany’ishengyero ab’orubaju oruhakani baheza kumara enshutamo 15 zikuratiine batarikwija mu Paramenti kandi bataine rusa kuruga omu ofiisi ye ahakwosha kwabo nibeija kubingwa.

“Timurikubaasa kurwanirira ekimurikwenda mwaba mutari munkiiko, nimurwana mwana muri aha omunda. Nahabw’ekyo tikirungi kuguma aheeru ya Paramenti, reero mukatandika kwetomboitira okwo, mwije tugonjoore ebizibu ebirikuteganisa abantu,” Among arikugambira ab’orubaju oruhakani.

Among nabwo yajumirira abany’ishengyero ab’orubaju oruhakani ahabw’okucwamu kutwara enshonga zaabo ahanguuto aha mwanya gw’okuzireeta omu Paramenti bakazihajanaho arikugira ngu ebikorwa byabo tibirimu kukwatanisa kwona oku Paramenti y’omurundi gwa 11 erikurwanirira.

Abany’ishengyero ab’orubaju oruhakani bakarahira obutagaruka munshutamo zoona  okuhisya obu enshonga zaabo 7 zirakorweho.

Aba bakahereruka kushohora omu Paramenti ahabiro 19/10/2023 kandi eki kikarugirira ahari gavumenti kuremwa kugarukamu enshonga y’okuribatirira obugabe bw’abantu.

Omu rushutamu rwa Paramenti, omwebembezi w’orubaju oruhakani, Mathias Mpuuga akashaba gavumenti kushoborora ahanshonga y’abaserukare ba UPDF ab’aha maizi kukoresa amaani mingi n’okutuntuza abajubi, okuteera amasasi okwabaireho omu kwezi kwa 11, 2020 hamwe n’okureekura abanyabutegyeki abaakomirwe batateirweho bushoshoreki bwona n’ebindi.

Beitu omu kugarukamu aha nshonga egi, Minisita w’eihanga ow’enshonga z’omunda, Gen. David Muhoozi naagira ngu enshonga ezi nizibaasa kugonjoorwa kitaka nikwo kushaba ab’orubaju oruhakani okukwatanisa na gavumenti kureeba ngu enshonga ezi zaakorwaho.

#WestUpdates