Omwebembezi w'orubaju oruhakani omu eishengyero Mathias Mpuuga yaagira ngu nibeija kugumizamu n'okwesharinga

‘Nitwija kugumizamu n’akesharingo keitu’ – Mpuuga

N’ebya Dedan Kimathi

Orikukurira orubaju oruhakani omu eishengyero, Mathias Mpuuga naagira ngu abany’eishengyero ab’orubaju oruhakani nibaija kugumizamu n’akesharingo kaabo kuhitsya obu gavumenti eragarukyemu okushaba kwabo.

Abany’eishengyero ab’orubaju oruhakani bakashohora omu rushutamo rwa paramenti ahabiro 19/10/2023 obwo barikujunaana gavumenti okurubatiriira obugabe bw’abanya Uganda namunonga abarikuhakanisa gavumenti.

Omu kushatama, Omwebembezi w’orubaju oruhakani Mathias Mpuuga akashaba Gavumenti okushoboorora ahanshonga ezirimu amahe ag’ahamaizi okutuntuuza abashohi, abantu abaitsirwe Okwikumi nakumwe 2020, okutuntuuza ab’orubaju oruhakani n’abantu abakwatsirwe abatakarekurwaga.

Mpuuga akagira ngu abahagizi barikurenga 500 aba NUP bakakwatwa omubicweka bitari bimwe omu eihanga omugwa 2021. Omuri aba, abarikurenga omuri 50 bakiri omubihome ebya Kitalya na Luzira obwo batatweirwe omu kooti.

Beitu hoona Minisita w’eihanga ow’enshonga z’omunda y’eihanga, Gen. David Muhoozi akashoboorora ngu zimwe ahanshonga bazigarukiremu kandi ezindi nazo nibaija kuzigarukamu.

Bwanyima ya wiiki 3 besharingire, oihireho Sipiika Anita Among kugaruka omu eishengyero, Mpuuga yamanyisa abany’eishengyero aha paramenti ngu nibaija kugumizamu besharingire nk’orubaju oruhakani.

#WestUpdates