Owayetsimbireho ahabwa Purezidenti emirundi 4 atarikusiinga, Col. Dr. Kizza Besigye.

N’ebya Umaru Kashaka    

Owayetsimbire ahabwa Purezidenti emirundi 4 atarikusiinga, Col. Dr. Kizza Besigye yayigura orutaro aha beebembezi b’ekigombe kye ky’eby’obutegyeki ekya FDC abariho hati.

Besigye yaagambira orukiiko rw’abanyamakuru omuri Kampala eriizooba ngu n’eky’omugasho munonga okuzahuura ekigombe kya FDC kukiiha omu mikono y’abeebembezi bakyo abariho hati abarikweyendeza.

“Twine abantu abarikweyendeza omu kigombe eki kandi abantu abamwe nibanjunaana ahabw’okugira ebigyendererwa byangye omu FDC. Nkakora encuro zangye 2 nk’oku engyenderwaho y’ekigombe erikuragiira, tinkabaasa kugaruka kuba omwebembezi wa FDC omurundi ogundi kandi tindikuronda bwebembezi bwona omu kigombe eki,” Besigye arikugambira omu ofiisi ye ahari Katonga Road omuri Kampala.

 “Tindikuronda na bwebembezi omu gavumenti. Ekindikuronda n’obugabe ah’eihanga ryeitu kwenda ngu tubaase kugira eiraka rimwe omu eihanga eri. Mbwenu ni ki eki nkubaire nindonda omu FDC kuza kubaganisamu ekigombe?. Besigye arikushoborora.

Obutaikirizana omu FDC buri ahagati ya Purezidenti w’ekigombe eki, Patrick Amuriat Oboi, omuhandiiki mukuru wa FDC Naandala Mafabi hamwe n’omugambirizi w’ekigombe eki Ibrahim Ssemujju Nganda n’omuhwezi wa Purezidenti ahabw’ekyanga ekya Buganda, Erias Lukwago.

#WestUpdates