Abeebembezi kuruga omukyanga ekya Burengyerwa-eizooba baagizireho omushomo..(Photo by Aidan Bataringaya)

Okutunguura eby’emyooga, abaherize eby’emikono kuhwerwaho Gavumenti

N’ebya Aidan Bataringaya

Mbarara

Abukirikukwataho okuruga omu kyanga ekya Burengyerwa-izooba nibashabwa okureeba ngu bayaakiira abaana abarikuba baheerize eby’emikono okuruga omumatendekyero ga gavumenti ag’eby’emikono.

 
Okushaba oku kuhairweyo Eng. Raymond Kamugisha orikukurira purogyekiti za purezidenti hamwe naza ‘industrial hubs’ omu Uganda

Okutunguura eby'emyooga omuri Burengyerwa-eizooba..(Photo by Aidan Bataringaya)

Eng. Raymond Kamugisha ebi abigambire obu abaire ayebembeire orukiiko rw’abukirikukwataho okuruga omuri za disiturikiti 12, munisiparite 4 n’orurembo rumwe omukyanga ekya Burengyerwa-eizooba yoona.

Orukiiko oru ruhikirwemu ba ceyamaani baza disiturikiti, ba diisi, ba DISO, ba RDC, abajwekyerwa b’eminyeeto, abakazi n’abarema hamwe n’abandi, abasiimire Purezidenti Museveni ahabw’okutandikaho itendekyero eri omuri Burengyerwa-eizooba.

RDC wa Mbarara, Emmy Kateera Turyabagyenyi...(Photo by Aidan Bataringaya)

Abamwe borekire okwetomboita ahabw’enamba nkye y’abeegi ei buri disiturikiti erikutsindika.

RDC Emmy Kateera Turyabagyenyi ashabire abeebembezi okuta omunkora ebi bashomesiibwe, ahabw’okuba Purezidenti nayenda okumaraho eibura ry’emirimo omu Uganda.

Didas Tabaro, Ceyamaani LCV ahabwa Mbarara..(Photo by Aidan Bataringaya)

Uganda erimu ‘Presidential Industrial Hubs’ 19 ezirimu n’eya Rushozi omuri Rubaya Mbarara, erikutendeka abaana eby’emikono ahabwabusha, ahu eminyeeto 235 baheerize emishomo yaabo kandi 273 bariyo nibatendekwa.

#WestUpdates