Omutsigazi acumitsire owa LDU ebisyo, yamureka arikubi...(Photo by Adolf Ayoreka)

N’ebya Adolf Ayoreka

Mbarara:

Abatuura omukyaro kya Kyampisi omu woodi ya Kishasha omuri Mbarara City North bagwereirwe akagwe bwanyima y’omutsigazi okucumita owa LDU akamutsiga ahancwamba zarufu.

Ebi bibaireho nyomwabazyo, 12/7/2024 ahamukoro gw’abakazi ba woodi ya Kishaha ogubaire guri ahakishaayi kya Kishasha primary school.

Hon. Ritah Bwahika, Woman MP Mbarara City obaire ari omugyenyi mukuru ahamukoro ogu...(Photo by Adolf Ayoreka)

Emikoro ebaire eriyo negyenda omumaisho kurungi nikwe kuhurira abakazi ababaire bashutami haihi n’ebyooma bya disco batandika kuteera orwari bwanyima y’okureeba omutsigazi omanyirwe nka Ssajja yatandika kucumita ebisyo Nicholus Mujuni ori LDU omukyanga ekyo nikwe kubaho akeimukyero.

Eky’omugisha murungi ahamukoro habaire hariho abapooriisi okuruga aha pooriisi ya Koranorya nikwe kutangira abantu ababaire bamaririize okwiita Ssajja obutamwita.

Ab'eby'okwerinda babaasiize kuhunzya omutsigazi obu ou abatuura babaire nibenda kwiita...(Photo by Adolf Ayoreka)

Pooriisi ehungize Ssajja obutamwita nikwe kureekaho Nicholus arikutaaga, aho niho Ritah Bwahika Atukwase omuny’eishengyero-kazi ahabw’orurembo orwa Mbarara City obaire ari omugyenyi omukuru kuheerezayo emotoka ye okutwara Nicholus ahari Koranorya Police ahu aba pooriisi bamwihire barikumutwara ah’eirwariro erikuru erya Mbarara.

Tutungire okumanyisibwa ngu Ssajja, omutuura wa Nyakanengo cell we n’abakuru be batwire nibarondwa ahamushango gw’okwita ishebo Fredrick Kalemera emyezi nka 4 ehwire.

Ogu akwatsirwe yatwarwa aha pooriisi ya Koranorya..(Photo by Adolf Ayoreka)

Amakuru nigoreka ngu bwanyima y’okufa kwa Fred Kalemera, pooriisi ya Koranorya ekakwata abaana be nanyina kwonka beija barekurwa omumuringo gw’ekishoboobo kandi hati fayiro y’omushango ebire eyimukibwe kandi Nicholus Mujuni abaire eyizire ahamukoro okukwata Ssajja.

Abakazi ba Kyampisi omuri Kishasha ababaire nibajaguza ekiro ky'abakazi...(Photo by Adolf Ayoreka)

Ssajja akwatsirwe kandi tusigire bamuteka omukadukuru ka pooriisi ahari Koranorya obwe okucondooza kurikugyenda omumaisho.

#WestUpdates
#RadioWestAt25