Abella Amutusimire owaafeera omuri butandu.

N’ebya Aloysius Byamukama

Abatuura b’ekyaro kya Kihunda omu disiturikiti ya Sheema baasigara omukahuriko omwabazyo gw’eriizooba bwanyima y’okuhurira amakuru mabi g’okufa kw’omwegi arikugwa omuri butandu y’ahanguuto. 

Abella Amutusimire nibwo abeire aherize kujaguza obusinguzi bw’emishomo ye bwanyima y’okushohora kw’ebigyezo bya siniya ya 4 eby’omwaka 2023.

Abella, 17, obaire naatuura n’ishe, Rev. Erisam Bishanga omuri Kyamuhunga ahi abeire naakorera ahari Kyamuhunga Church of Uganda ahansi y’obureeberezi bwa West Ankore, yaaba naaruga kwakiira ebaruha ye y’okumwikiriza kuza omu siniya ya 5 ahari Kibingo Girls School ahi amazire emyaka 4 omuri Kabwohe, omu Munisiparite ya Sheema omu disiturikiti ya Sheema.

Atungire ebyarugire omubigyezo bye kandi abaire ahikiire omu idaara ry’okubanza n’obubonero 32 kandi yaaba ahairwe amashomo ga Geography, Entrepreneurship na Agriculture agu yaaba naija kutandika kushoma omu siniya ya 5.

Eishomero rya Kibingo naryo riri omukahuriko. Aba baabika omwishiki ogu kandi ahi twatungira amakuru aga entebeekanisa z’okuziika zaaba zitakabeireho. 

Omugambirizi wa Poorisi y’ekyanga kya Bushenyi empnago, SP Martial Tumusiime, yaagira ngu butandu egi yaabaho omu tauni ya Rwentuuha obu ekimotoka ekya Sinotruck ekihandiikire omu namba UAZ 831K kyatomera Amutusimire owaaba yaaheza kugwa arikuruga ahapiki ya boda ehandiikirwe omu namba UEY 741L.

“Nikigambwa ngu eriizooba ebiro 19.02.2024 ahari shaaha nka 8 n’ekicweka z’eihangwe, piki y’enamba UEY 741L yaaba eheekire (omwishiki) kuruga orubaju orwa Sheema eyorekyereire ogwa Bushenyi. Ku yaahika Rwentuuha, omuvugi yareeba ekimotoka kya Sinotruck kibakurateire nikwo kuhindura piki arikugigarura omukono gwe gwa bumosho. Omukaire yaatomera kandi owaaba aheekirwe yaahanatuka aha piki yaagwa, yaafeeraho,” Tumusiime nikwo yaagira.

Omuvugi, Clinton Niwetwesiga, 24, kandi munyanya w’omugyenzi, yairukangizibwa Kitwe ahakarwariro kujanjabwa aho n’aho.

Okurugiirira ahari poorisi omuri Rwentuuha, eyebembeirwe Sgt Kenneth Mutange, yaarahuka kuhika ahamwanya kandi yahweraho ahakutandika kw’okucondooza.
Tumusiime yaagira ngu omubiri gw’omugyenzi gwatwarwa ahari Kampala International University Teaching Hospital kukyeberwa kandi omuvugi w’ekimotoka ari omumikono ya Pooriisi.

#WestUpdates