Enanga naagira ngu obwa hati nibaronda Dr. Eron Lawrence okibuzire obwo okucondooza kurikugyenda omu maisho. Police Photo.

N’ebya Omushaki Weitu

KAMPALA

Pooriisi omuri Kampala eriyo neehiiga Dr. Eron Lawrence, 56, Omushomesa ahari Kyambogo University, kandi Diini wa Faculty of Special needs and Rehabilitation ahabw’okugambwa kuba yatooroboize omwegi w’emyaka 16 oine oburema aha mubiri gwe.

Nikigambwa ngu Dr. Lawrence akabura kuruga aha University bwanyima y’okureekurwa aha Pooriisi bondi ahabiro 14/12/2023 ahi yabaire akwateirwe aha mushango gw’okutooroboza omwishiki w’emyaka 16 kandi akamusiiga akakooko ka sirimu. 

Omwishiki ogu akaba nareebererwa ahansi ya purogyekiri eya All We see is a Possibility Project. Abayemeriire Dr. Lawrence aha Pooriisi abarimu; Olobo Lawrence, 48, Adoch Gertrude hamwe na Among Paul,54, nabo bashabirwe kumuronda ahu ari bakamutwara ow’omuduumizi wa Pooriisi ya Jinja Road.

Fred Enanga, Omugambirizi wa Pooriisi naagira ngu obuhame obwahikireho nibworeka ngu nyakuteekateekwa akagyenda n’abeegi 4 abarimu n’omwishiki w’emyaka 16 omurema kwetaba omu mushomo omu rurembo Nairobi omuri Kenya kandi bakagaruka ebiro 12/1/2023. 

Dr. Lawrence akakwata emotoka ye ei yabaire asiigire aha kishaayi ky’enyonyi nikwo kuheereza abeegi aba ‘lift’. Akabanza kutwara abeegi 2 aba Gulu University omu Paaka ya Namayiba Taxi Park kubatembesa emotoka ezirikuza Gulu. 

Akagaruka yatwara omwegi wa kashatu ahari North Hall, Kyambogo University nikwo kuguma omu motoka n’omwishiki w’emyaka 16 orikuhweza omu bwire bw’eihangwe bwonka yaaba ajwire garubindi.

Akavuga motoka shaaha nka 4:30 z’ekiro nikwo kuhika omu kyaro kya Namugongo Nsawo omuri Kira Munisiparite kandi ku bahikire omu muhanda, omwishiki ogu yashaba amaizi g’okunywa nikwo Dr. Lawrence kugamugurira aha Supermarket aha ruguuto orwa Ndagire omuri Naalya. 

Bwanyima y’okunywa amaizi, omwishiki akabura amaani yaagwa kihuumura. Ku yagarukire eruguru yashanga nashaasha ebicweka bye by’ekihama kandi akaza kushanga yashanga ngu bakaba bamuhambire. Ogu bakamuhambira omu motoka.

Omu kasheeshe akakurasireho, ishento akamuvuga yamutwara ah’eishomero omuri Mukono nikwo kuteebeza Omushomesa w’omuhuumuriza (Senior Woman teacher) owamanyiiseho mukuru w’eishomero batyo bakatwara omushango aha Pooriisi ya Mukono.

Eshagama eyashangirwe omu motoka ya nyakuteekateekwaho ehandiikirwe omu namba UBA 349Z ekatwarwa yakyeberwa DNA kandi ekaba neshushana n’eyabaire eri aha mubiri gw’omwishiki ogu. 

Pooriisi ekakwata Dr. Lawrence nikwo kumuheereza ‘Police bond’ kandi kuruga takareebukaga. 

Enanga naagira ngu obwa hati bariyo nibahiiga Dr. Eron Lawrence okibuzire obwo okucondooza kurikugyenda omu maisho.

#WestUpdates