Ahari shaaha nka 4 ‘akasheeshe, Pooriisi hamwe n’abamahe bagyezaho kutaatanisa abavugi ba boda abaaba baine ekiniga kyingi barikwejunisa tiiya gaasi beitu byaba ebya busha. Photos by Andrew Arinaitwe.

N’ebya Andrew Arinaitwe

KAMPALA

 Okufa kwa Steven Kimbowa kwasiga abavugi ba boda-boda bataahi be omu rurembo orwa Kampala baine ekiniga bwanyima y’ekimotoka kya kasasiro kumutomera kikamurengyeraho obu omu Pooriisi yaaba nagyezaho kukwata piki ye aharuguuto orwa Eighth Street omuri Namuwongo.

Ahari shaaha nka 4 ‘akasheeshe, Pooriisi hamwe n’abamahe bagyezaho kutaatanisa abavugi ba boda abaaba baine ekiniga kyingi barikwejunisa tiiya gaasi beitu byaba ebya busha.

Farouk Atenywa, omuvugi wa boda-boda kuruga Banda omuri Kampala naagira ngu abavugi ba boda-boda abaaba batarikurabwa mu maisho banyigisibwa omuringo ogu Kimbowa yaatwarizibwamu.

"omuvugi owa safe boda (Kimbowa) yaaba aine ba kasitoma 2, kandi yaaba atinire munonga bwanyima y’omu Pooriisi kukwata piki piki. Beitu hoona, omuvugi yaayanga kuhayo piki ye nikwo kusharamu kuginyurira kifuba akahendera agwire omu kimotoka kya kasasiro ekyamutomera akafeeraho,” Atenywa arikushoborora.

Ahari shaaha 4:30 z’akasheeshe, emotoka za Pooriisi ezirikukora Potoro zaaba niziruka ahabavugi ba boda boda kuruga aka Pooriisi ya Wampewo abaaba nibairuka aha motoka erikukiriza emotoka ezirikuba nizikiriza emotoka ezaatunga obuzibu ‘breakdown vehicle’ eyaaba eine za piki piki zitari zimwe ezaaba zikwateirwe omu kikwekweto kya Pooriisi.

Pooriisi yagyemeserezibwa kuteera tiiya gaasi bwanyima y’abavugi ba boda-boda kwetabura barikushaba ngu babaheereze piki za bataahi baabo ezaaba zikwatsirwe.

Za piki piki ezakwatirwa omu kikwekweto kya Pooriisi omuri Kampala ziri ahari kabangari ya Pooriisi. Photo by Andrew Arinaitwe.

Omuhwezi w’omugambirizi wa Pooriisi ya Kampala n’emyanya egiheriire, Luke Owoyesigyore yaagira ngi pooriisi yaatandika kucondooza omu nshonga egi.

Okurugiirira ahari Owoyesigyire, abavugi ba boda boda barikurenga 100 baaba barundaine omu buhenda biragiro kandi baking enguuto nyingi ahari Mukwano, Yusuf Lule, Jinja n’enguuto eza Kampala. Nabwo yakyoreka ngu abamwe baaba nibatambikira aba Pooriisi amabare.

#WestUpdates