Dr. Michael Atingi-Ego, ou Purezidenti Museveni yaatoorana kuba Governor wa Bank of Uganda arikuza omubigyere by'omugyenzi Prof. Emmanuel Tumusiime-Mutebile

N’ebya Umaru Kashaka

Purezidenti Yoweri Museveni yaatoorana Dr. Michael Atingi-Ego nka Governor wa banka ya Uganda kandi Prof Augustus Nuwagaba nk’omuhwezi we

Minisita w’eby’esente Henry Musasizi yaahamya amakuru aga eriizooba ebiro 10.02.2025.

Prof. Augustus Nuwagaba, owaatooranwa nk'omuhwezi wa Governor wa Bank of Uganda

“Ego, mukuru w’eihanga yaabatoorana,” nikwo Minisita yaagira ku twamuhikiirira.

Banka y’eihanga etwire neekora emirimo yaayo etaine mwebembezi kuruga obu Prof Emmanuel Tumusiime-Mutebile afa ebiro 23.01.2022

Ekiragiro kya banka ya Uganda nk’okukyagarukirwemu nikigira ngu, haaba hatariho Governor, omuhwezi we naamuza omubigyere. N’ahabw’ekyo Atingi-Ego owaatandikire kukora nk’omuhwezi wa Governor ebiro 23.04.2020 atwire ayebembeire emirimo egi.

Mutebile owaakozire nka Governor wa banka ya Uganda kandi akagaruka akakurira akakiiko k’abeebembezi baayo kuruga omugwa 2001, akafa harikuburayo ekiro kimwe Purezidenti Museveni akaigura emirimo y’eihanga eyaabeire eyemereziibwe ahabw’endwara ya Covid-19.

Abahangu nibagira ngu tihariho bwire obuteirweho obu Purezidenti ashemereire kuba yaatooraine Governor.

“Governor naakora emikuru nk’omuntu orikuba naakurira ekitongore kya banka enkuru beitu hoona nabwo, naakurira akakiiko akarikureeberera eby’empiiha omu ihanga,” Dr. Fred Muhumuza omushomesa w’eby’empiiha n’entaasya ah’itendekyero rya Makerere nikwo arikugira.

“Ogu yaashoboorora ngu Governor naajunaanwa munonga aha mirimo ya banka ya Uganda. Emirimo egi n’ey’okukora n’okuta omunkora ebiragiro ebirikukwata ahaby’esente omu ihanga hamwe n’okureebuuza n’okureeberera emirimo y’ebindi bitongore by’esente.”

Ekigyendererwa kya banka ya Uganda kihanguhibwa kyayongyerwamu n’okuhwera eihanga okureebera hare na munonga omuby’empindahinduka omumituurire y’abantu n’entaasya omu ihanga, eki abahangu barikugira ngu nigwo musingye gw’okwinegyeza emihendo etarikuhinda-hinduka hamwe n’enkora nungi omuby’empiiha, ekintu eki banka ya Uganda etuura eteireho eriisho