SACCO z’emyooga omuri Mbarara zihabwirwe aha kuramburwa.

N’ebya Joseph Bahingwire

MBARARA
 
SACCO z’emyooga nizihaburwa kutaho enteebekanisa ey’okurambura n’okushwijuma emikorere yaazo hamwe n’obwebembezi bwa SACCO ezi.

Ekitongore ky’eby’esente ekya Microfinance Support Center kiteebekanise orutaayaayo n’enkiiko omuri Mbrarara, Bushenyi, Rwampara n’omuri za disiturikiti ezindi kubaasa kuhaana amagyezi n’obuhabuzi ahaku za SACCO z’emyooga zeine kwetunguura.

Abeebembezi ba SACCO y’emyooga kuruga omu kyanga ekya Busoga bamazire wiiki yoona barikurambura za SACCO zitari zimwe ez’omu kyanga ekya Bushenyi empango na Ankole.

Aba bataayaayire za SACCO ezirimu; Mbarara City North Produce Dealers Emyooga SACCO. SACCO egi ekatunga etandikwa ya shiringi miriyooni 50 kandi obwahati esente ezi zeyongyireho.

Atweta Abdulwahabu, Ceeyamaani boodi ahabwa SACCO egi nakyoreka ngu obwahati baine ebigombe birikurenga omuri 140 eziri omu SACCO egi eya Mbarara City North Produce Dealers Emyooga SACCO. Eki kibahwerire kwongyera aha sente ezi barikubika kuhika ahari shiringi biriyooni 2.

Atweeta naagira ngu esente z’emyooga zibaasize kuhwera abantu baingi omu kutunguura amaka gaabo n’emiturire yaabo.

Naagira ngu ekizibu eky’amaani eki baine nahabw’emihingo eri aha kuguuza emishuuburo omu mahanga g’aheeru na munonga obuhuunga, cereals n’ebindi arikugira ngu n’abokwija kuhandiikira gavumenti kutaaha omu nshonga egi.

 
Naashaba za SACCO ezindi eziriyo nizitandika kukura okukwatanisa n’okugira abeebembezi abari eky’okureeberaho ahabw’okwenda kutunguura SACCO zaabo.

Za SACCO ezindi ezi bataayaayire harimu; Sheema Financial services omuri Kabwohe, Sheema disiturikiti hamwe na Rwanyamahambe SACCO omuri Mbarara. Aba basiimire ekitongore ekya Microfinance Support Center ahabw’okubaabasisa bakabaasa kutunguura ebyanga byabo.

Ebyo bikiri aho, omu disiturikiti eya Rwampara, ekitongore ekya Microfinance Support Center nabwo kihaire Kinoni SACCO ebaasize kutunguura kuruga ahari sente z’entandikwa ezirikwingana shiringi miriyooni 600 ezi batungire kandi obwahati SACCO egi n’eyamaani.

Merab Katushabe, Manegya wa Kinoni SACCO nakyoreka ngu SACCO yaabo ekaba yakumbagaire beitu bakacwamu kugimusya kurabira omu kukwatanisa.

SACCO egi obwahati eine ebintu omu disiturikiti ya Rwampara ebibarirwemu esente nyingi kwongyerera ahari shiringi biriyooni 1.5. 

SACCO z’emyooga nizishabwa kugira abeebembezi barungi ab’amaziima zaaba nizenda kukora nk’oku Kinoni SACCO yabaasize kukura.

#WestUpdates