Aba Boda Boda barikuvuga piki aharuguuto rwa Nalweyo omururembo Hoima. PHOTO: Peter Abaanabasazi

N’ebya Peter Abaanabasazi

Gavumenti eshabirwe kuteerera aba Boda Boda omuranga omukyanga kya Bunyoro kutunga ebipapura ebirikubaikiriza kuvuga za piki, obwo baingi barikugumiza n’okwehuzya okwehandiikisa n’ekitongore ky’eby’emirimo n’entambura eky’okuhandiika abavugi ba za boda.

Okwetomboitwa oku kuhairweyo obu ekitongore ky’eby’emirimo n’entambura bakwataniise n’eishomero ry’okuvuga ebiiruka ekya WENDI omururembo rwa Hoima.

Okuha za layisinsi za kireetsirwe Gavumenti n’ekigyendererwa kukyendeeza abavugi bataine bipapura ebirikubaikiriza okuvuga ahanguuto

Abel Kanyankole, orikukurira ekibiina ky’amashomero agarikwegyesa okuvuga omu Uganda hamwe n’orikukurira WENDI, bagizire ngu okuha za layisinsi kutandikire omwaka oguhwaire omuri Bunyoro. Beitu hoona, n’obu baraabe bagiireyo emirundi 3, n’abavugi bakye munonga abejumbire omukwehandiikisa oku.

Kanyankole agizire ngu za piki n’ekizibu ky’amaani kandi nizo zirikukira kureeta za butandu ezirikutwara amagara g’abantu ahabw’obutamanya bw’abavugi ahabikwatiraine n’ebiragiro by’ahanguuto.

Omubantu 1,000 abahandiikirwe kutunga ebihandiiko ebirikubaikiriza kuvuga, babiri bonka nibo babaire bari aba Boda Boda, kandi ogu n’omubaro mukye munonga wagyeranisa n’abarikuvuga omukyanga eki.

Ogu ashabire Gavumenti kutaho emiringo y’okuhiga abavugi ba Boda Boda kutunga ebihandiiko ebi kurinda amagara g’abantu. Agizire ngu baingi omubavugi ba Boda Boda tibarikwetegyereza mugasho gw’okuba oine layisinsi n’obu omurimo ogu barikukora omuby’entambura guri ogw’amaani.

“Obu twabaire turi omu disiturikiti ya Kakumiro, Minisita w’eihanga ow’eby’emirimo n’entambura, Fred Byamukama, acwereire aba Boda Boda ahabishare by’okutunga za layisinsi kwonka bakye nibo baizire kwehandiikisa. Aba Boda Boda batubeereire ekizibu ahabw’okuba omuntu ku arikutunga sente, agura piki atandika kukora atarikumanya kuvuga n’obwerinzi. Bwanyima y’ebiro bikye, bareetaho za butandu ezirikuta amagara gaabo n’abandi bantu omukabi,” nikwo agizire.

Arikugamba ahamurimo gw’okuhandiika aba za layisinsi, Kanyankole agizire ngu omubaro gw’abavugi abarikwenda ebihandiiko ebirikubaikiriza kuvuga gubabeireho mwingi. Okuhandiika okwatandikire ebiro 10.06.2024 kugyendereire kuhwa ebiro 15.06.2024 kwongyeziibweyo kuhisya Orwakataano wiiki erikwija ahabw’ekyetengo kihango ekya za layisinsi.

Ahi bugiire kuhikira Orwamukaaga ebiro 15.06.2024, za pamiti zirikurenga omuri 1,000 zibaire zaahairwe kandi bagyendereire kuhisya pamiti 3,000 ezi barikuha abavugi omukyanga eki.

Moses Kurungi, omwe ahari abo abatungire pamiti asiimire gavumenti ahabw’okuhisya obuheereza bw’okubaha pamiti omubyanga byabo. Ogu ayongyeire yaagira ngu abantu baingi babaire nibavuga za pamiti ahabw’okubaasa babaire batarikubaasa bishare by’okuza Kampala kukora ahaby’okuzitunga.
Kurungi, ou ebiro bya pamiti ye eby’okukora ahanguuto bibaire byahwaireyo, ayongyeirweho obwire obundi bw’okukora ahakasente kakye munonga omumurimo gw’okuhandiikisa.

James Murungi, omuvugi wa Boda Boda, agizire ngu nabo bakaabaire nibenda kwehandiikisiza layisinsi kwonka kukora eki nibetaaga sente nyingi ezi bataine. Ogu ashoboroire ngu abavugi ba Boda Boda abaingi bariyo nibashashura za looni ezi baariire kugura piki kandi abamwe nibapagisa piki, ekirikubareetera kuremwa kurundaana sente z’okugura pamiti.
Ogu ashabire gavumenti ku ebaha pamiti za busha

#WestUpdates
#RadioWestAt25