Omu rukiiko oru, Amuriat yashaba ba memba b’ekigombe ekya FDC kuta amaani aha kuronda obushagiki bw’ekigombe omu eihanga ryona. PHOTOs by FDC.

N’ebya Ivan Tsebeni

NAJJANANKUMBI

Akakiiko ka FDC aka National Executive Committee (NEC) akarikukurirwa Purezidenti w’ekigombe eki, Patrick Oboi Amuriat, bagiraho orukiiko aha kitebe kikuru ky’ekigombe omuri Najjanankumbi kweteebekanisiza akaruuru ka boona aka 2026.

Omu rukiiko oru, Amuriat yashaba ba memba b’ekigombe ekya FDC kuta amaani aha kuronda obushagiki bw’ekigombe omu eihanga ryona.

Yahamisiririza omugasho gw’ekigombe kweteebekanisiza gye akaruuru obwo barikuronda obushaki omuri ba memba b’ekigombe n’okuhandiika ba memba abasya.

"Tutwire tuhunamire kandi abantu abamwe babaire nibateekateeka ngu turugire aha muramwa. Ninyenda kubagambira ngu tubaire turiyo nitutebekanisa okuturarondemu akaruuru aka. FDC ekiriho omu maani,” Amuriat arikushoborora.

Stella Isodo, Omuny’ishengyero-kazi wa Ngora yashaba ba memba okugaruka omu kigombe n’okukishagika kureeba ngu kyakura.

Yaraganisa kureeta abakazi kuruga omu eihanga ryona kureeba ngu bayegaita aha kigombe eki arikukyoreka ngu FDC ekiine amaani g’okutwara obwebembezi.

Ogu tigwo murundi gw’okubanza, FDC kutunga ebizibu birikurugirira aha ntaro z’omunda y’ekigombe eki.

Omu mwaka gwa 2017, guruupu eyabaire neyebemberwa owabire ari Purezidenti w’ekigombe obwire obwo, Maj. Gen. Mugisha Muntu akanga kwikirizana na bataahi be nikwo kucwamu kwebaganisamu ekyareteire Muntu okutandikaho ekigombe kye ekisya ekya Alliance for National Transformation.

Obwa hati, FDC nabwo ariyo neteganisibwa entaro z’omunda y’ekigombe ekiretsireho okwebaganisamu omuri ba memba.

#WestUpdates
#RadioWestAt25