Aba FDC eya Katonga bayanjura ekigombe ekisya eky’eby’obutegyeki ekya People's Front For Freedom. Photo by Isaac Nuwagaba..

N’ebya Isaac Nuwagaba

Ekigombe kya FDC eya Katonga kyayanjura ekigombe ekisya eky’eby’obutegyeki ekibayeta People’s Front for Freedom (PFF). 

Ekigombe ekya FDC eya Katongo ekirikwebemberwa owabaireho Purezidenti wa FDC, Col. Dr. Kizza Besigye na Loodi Meeya wa Kampala, Erias Lukwago n’abandi batwire baine obuteikirizana n’abeebembezi b’ekigombe ekya FDC eya Najjanankumbi kumara akaire. 
 
Okurugiirira ahari Promota w’ekigombe ekisya, Ingrid Turinawe- eiziina ry’ekigombe kyabo ekisya ekya People’s Front for Freedom (PFF) ryayoheerezibwa omu kakiiko k’eby’oburuuru kuba nirimanywa omu kakiiko.

“Nk’abeebembezi abaruhire n’ekigombe kya FDC, tushaziremu kutandikaho ekigombe ekisya kandi hati twatandiika entebeekanisa ez’okuhandikisa ekigombe kyeitu omukwetegurira akaruuru ka boona aka 2026,” Turinawe arikushoborora.

Ekigombe kya FDC eya Katonga kizire nikijumirira abeebembezi ba FDC eya Najjanankumbi abariho hati barikubatura okuremwa kuhakanisa gavumenti y’ekigombe kya NRM ekiri omu bwebembezi etwire neyebemberwa Purezidenti Yoweri Kaguta Museveni kuruga 1986.

Dr. Besigye aizire nayoreka obutamarwa bwe aha beebembezi b’ekigombe ekya FDC arikugira ngu baremirwe kugyendera aha bigyendererwa by’ekigombe. 

Nabwo, atwire nabajunaana okurya enguzi kuruga omu karuuru ka 2021 bwanyima y’okugambwa kuba bayaakiire esente zirikuhika shiringi 7,000,000,000 n’ekigyendererwa ky’okwiha ekigombe kya FDC aha muramwa gwakyo.

#WestUpdates